Sápmi |

Inku Saijets lea okta Anárvahkuid "someteaddjiin"

Anárvahkuin leat dán jagi vuosttas háve nu gohčoduvvon someteaddjit. Sin bargun lea fitnat Anárvahkuid dáhpáhusain, váldit govaid ja čállit dáhpáhusaid birra sosiála mediai. Inku Saijets lea okta čieža someteaddjis.

Jietna: Geasseradio 26.7.2016 (álgá áiggis 28:22)

Inku Saijets lea okta Anárvahkuid nu gohčoduvvon someteaddjiin.

Someteaddji bargun lea fitnat Anárvahkuid dáhpáhusain, váldit govaid ja čállit dáhpáhusaid birra sosiála mediai, dego Facebookii ja Instagramii.

– Dihtoláhkaihan dat lea dego doaimmaheaddji. Finan dáin dáhpáhusain, válddán govaid ja vehá čálestan dan birra ja iežan dovdduin. De dieđusge lea dehálaš, ahte dasa galgá daid háštággiid bidjat ahte #somettaja ja #Anárvahkut. Dat lea dakkár, oaččon ieš fitnat doppe okto.

Saijets oinnii meassemánus rekláma someteaddji barggus, mas jerrojuvvui, álggatgo someteaddjin.

– Mun ahte na joo, manin ii, sáhtán mun iskat. Mun in leat barggus dál, de mus livččii vejolašvuohta fitnat dáid dáhpáhusain. Dieđusge das lei dat, ahte daidda dáhpáhusaidda beassá nuvttá, de dat lei dakkár stuorra geasuheaddji.

Fitná miellagiddevaš dáhpáhusain

Anárvahkuin lea oktiibuot čieža someteaddji. Sii leat Johanna Alatorvinen, Mirja Karjalainen, Juha Kauppinen, Piiku Marin, Riitta Maukonen, Ida Pirttijärvi ja Inku Saijets.

Inku Saijets atná someteaddji barggu somán.

– Mun in leat áibbas juohke beaivve fitnan ja in leat áibbas juohke sajis fitnan, muhto miellagiddevaš dáhpáhusain. Golbma jagi leamašan doppe restoraŋŋa Kultahippus Avvilis barggus, de mun smihtten ahte dál mun beasan fitnat doppe Ivaloiset-geasseteáhteris ja de daid earáinge dáhpáhusain. Áibbas somá dat leamaš gal.

Sámegillii Saijets ii leat álgán sometit.

– Eai Anárvahkuin oppe leat dat dáhpáhusatge sámegillii, dahje in dieđe livččiigo lean dalle Anáris bearjadaga, muhto in leat sámegillii čállán maidege.

Mánáidbeaivi, čáhcecrossat, meallunhommát...

Miellagiddevaš dáhpáhussan Saijets namuha maŋŋebárgga mánáidbeaivvi Avvilis. Eanetge miellagiddevaš dáhpáhusat Saijets mielas leat: ihttin gaskavahku lea adnongálvvuid vuovdindáhpáhus Hotealla Kultahippu šiljus ja lávvardaga leat cáhcecrossat.

– Gal dat leat vaikke makkár dáhpáhusat, masa beare liiko. Leat márkanat ja dakkár meallunhommát.

Saijets áigu ieš vuolgit duorastaga Anárjávrri ala vuosttas háve iežas eallinajis.

– Doppe lea dakkár go fanastuvra Vesa-Matti Loiri paradiisas. Dat lea mu vuosttas geardi, mun lean dušše dálvit fitnan gielkkáin Anárjávrri alde ja dál mun beasan geassit, vehá gelddolaš.

"Eanet olbmot go mannan gease"

Dán rádjai Inku Saijets lea someteaddjin fitnan teáhteris lávvardaga, mánáidkonsearttas Sajosis sotnabeaivve ja Báikkálaš niesttit- nappo Paikalliset eväät -dáhpáhusas vuossárgga.

Saijets jáhkká, ahte Anárvahkuin leat dán jagi eanet olbmot go diibmá.

– Dálki lei mannan gease hui heittot. Dán gease mu mielas orru, ahte leat leamašan eanet olbmot jođus.

Inku Saijets gávdno namain Inkunas Instagramis, gosa son bidjá govaid Anárvahkuin. Konto lea priváhta.

Dat lea vuosttas jahki, go Anárvahkuin leat nu gohčoduvvon someteaddjit. Eanemus movttáskeaddji someteaddji bálkkašuvvo 100 euro skeaŋkakoarttain báikkálaš fitnodahkii.

Varrasamosat: Sápmi

Váldoođđasat

Varrasamosat

Muualla Yle.fi:ssä