Sápmi |

ISFI oaččui miljovnna ruvnno lassiruhtadeami – sámi filbmadahkkit sáhttet dál ohcat koronadoarjagiid

Koronaveahkkeruđaid sáhttá ohcagoahtit skábmamánu álggu rájes.

Anne Lajla Utsi
ISFI jođiheaddji Anne Lajla Utsi dadjá, ahte miljovnna ruvnno lassidoarjja goaikkehii filbmaguovddáža bursii juste rievttes áigge. Govva: ISFI

Sámi internašunála filbmaguovddáš oaččui dán vahkkus illu ođđasiid, go Norgga kulturdepartemeanta juolludii sámi filbmabargui miljovnna ruvnno dahje 100 000 euro sturrosaš lassidoarjaga. Oktiibuot dán ruhtajuohkimis Norgga filbmasuorgái juolludedje 45 miljovnna ruvnno ovddas doarjagiid.

Sámi internašunála filbmaguovddáža ISFI jođiheaddji Anne Lajla Utsi muitala, ahte sii leat vuordán ruđa ja dasa lea dárbu.

– Dat lea hirbmat buorre diehtu, dasgo mii leat áiddo almmuhan Covid-19 veahkkedoarjjaortnega. Mii leat oaidnán,ahte sámi filbmaealáhusas maid orro dárbu dakkár heivehuvvon ruhtadeapmái dán dillái mii dál lea, go lea nu olu eahpesihkkarvuohta, dadjá Utsi.

Go koronavirus mannan giđa leavvagođii, de ISFI jearahallagođii dakkaviđe sámi filbmaealáhusa ovddasteddjiin, mo pandemiija čuohcá sámi filbmamáilbmái. ISFI čielggadeami mielde badjel bealli buvttademiin maŋiduvvui ja juobe 80 proseantta filbmadahkkiin masse dietnasa.

– Olles filbmaealáhus ja máilbmi bisánii, nu dagai maiddái sámi filbmabargu. Ollugat masse vejolaš sisaboađuid, šadde maŋidit filbmabuvttadeami, nu ahte mii leat dalle njukčamánus jo sádden ohcama departementii, gos mii leat ohcan lassiruhtadeami. Dat lea dieđusge leamašan mielde čalmmustahttimin, ahte dáppe lea sierra dárbu.

"Sávvamis sámi filbmadahkkit ohcet lassiruhtadeami"

Skábmamánu álggu rájes sámi filbmadahkkit besset ohcat ISFI:s koronaveahkkedoarjagiid. Veahkkeruđa lea vejolaš ohcat geassemánu loahpa rádjái. Miljovnna ruvnno lassidoarjja goaikkehii filbmaguovddáža bursii juste rievttes áigge.

– Dieđusge dat boahtá hirbmat buorrin juste dál, go mii leat maiddái mearridan vuoruhit lassidoarjjaortnega sámi filbmaealáhussii.

Utsi sávvá, ahte sámifilbmadahkkit ohcet dál ruhtadeami veahkkedoarjjaortnega bokte.

– Mii sávvat, ahte sámi filbmadahkkit ohcet dán lassiruhtadeami mii lea. Sávvamis sii dustet ohcat stuorát buvttademiide, go dása sáhttá váldit mielde maiddái vuorddekeahtes goluid, go dilli lea nu váttis. Dat lea heivehuvvon ruhtadeapmi dán váttis dillái, mas mii buohkat leat dán Covid geažil, dadjá Utsi.

Varrasamosat: Sápmi

Váldoođđasat

Varrasamosat

Muualla Yle.fi:ssä