Sápmi |

Itálias ássi sápmelačča árgabeaivi epidemiijaguovllus: Ruovttus oažžu vuolgit dušše golmma siva dihte

Inka Saara Arttijeff ii dieđe, goas beassá fas Supmii. Su mielas karantena lea dán dilis áidna vuohki eastadit koronavirusa leavvama.

Kuvassa mies kävelee colosseumin ohi suojamaski päällä.
Itália lea guorranan turisttain maŋŋá go riikka šattai epidemiijaguovlun. Govva: Alberto Pizzoli / AFP

Olles Itália lea dál meroštallojuvvon epidemiijaguovlun. Koronavirus-epidemiija álggii Davvi-Itálias, muhto lea johtilit leavvan maid eará sajiide Itálias. Dávda lea njommon Itálias dássážii badjel 10 000 olbmui ja dasa leat jápmán badjel 600 olbmo (maŋŋebárga 10.3.).

Koronavirus lea šaddan epidemiijan Itália lassin Nannán-Kiinnás, Iranas, Mátta-Koreas, Tiroli guovllus Nuortariikkas sihke Duiskkas Nordrhein-Westfalenis. Suoma olgoministeriija ii ávžžut mátkkoštit epidemiijaguovlluide.

Itália ráđđehus bidjá 25 miljárdda euro koronavirus (COVID-19) dikšumii. Dasa lassin riikka stáhtaministtar Giuseppe Conte mielde ráđđehus lea maiddái gárvvis čavget virusa dihte ásahuvvon ráddjehusaid.

Suoma beale sápmelaš Inka Saara Arttijeff ássá Itália oaivegávpot Romas. Son ii sáhte vuolgit ruovttus gosage earágo bargguid, dearvvašvuođalaš sivaid dahje bákkolaš áššiid dikšuma dihte, ovdamearkka dihte borramušgávpái.

– Dáppe leat gidden skuvllaid, universitehtaid, ja mánáidgárddiid. Restoráŋŋat, bivttasgávppit, kafeat, ja máŋggat hoteallat maid leat gitta gaskaboddosaččat. Turisttat eai jur oidno, muitala Arttijeff mo lea Romas dál.

– Mun in leat nu balus gal, muhto fuolas das mo dat dilli dás ovdána ja man viidát virus leavvá ovdalgo njoammumat geahppánišgohtet.

Suomas unnán girdijohtolat Itáliai – "In dieđe goas beasan Supmii"

Arttijeff bargá Suoma Sámedikki riikkaidgaskasaš áššiid čállin. Su kantuvra lea Anáris, muhto bargá olu ruovttustis Romas Itálias. Inka Saara Arttijeff ruohttasat leat Anára Njellimis.

Suoma ja Itália gaskasaš girdijohtolaga leat geahpedan, ja ovdamearkka dihte suopmelaš girdifitnodat Finnair ja Suomas opererejeaddji girdifitnodat Norwegian leat heaittihan Itália girdiid gaskaboddosaččat oalát.

– Bearaš lea gal gohččon boahtit ruoktot, ja iešalddes ledjen boahtimin boahtte vahkus, muhto girdimášen ii girddege. In dieđe goas beasan fas Supmii, lohká Arttijeff.

Itália lea gieldán buot almmolaš dáhpáhusaid riikkas sihke geahpedan johtolaga. Itália lea gieldán maiddái heajaid dahje hávdádemiid čuovvovaš golmma vahkkui.

Inka Saara Arttijeff
Inka Saara Arttijeff ii bala gal virusis, muhto lea fuolas das, mo dilli ovdánišgoahtá. Govva: Sanna Autere / Kepa

Dakkár garra meannudeapmi lea dál áidna vuohki eastadit dávdda leavvama, oaivvilda Arttijeff.

– Gáttán, ahte Itália lea mearridan bidjat olles riikka karantenii danin, go itálialaččat eai leat váldán daid rávvagiid duođas. Áidna vuohki eastit dávdda leavvama lea garvit stuora olmmošjoavkkuid ja bissut ruovttus, nappo mu mielas dat dáidá leat áidna vuohki dál, smiehtada Inka Saara Arttijeff.

Varrasamosat: Sápmi

Váldoođđasat

Varrasamosat

Muualla Yle.fi:ssä