Sápmi

Jan-Eerik Paadar čuorvvasgávppis ja eará ruhtaskeŋkejumiin lea čoggon sullii 10 000 euro – ruđain leat dolvon boaittobeal giliide biebmopáhkaid

Jan-Eerik Paadar ja kumppanit ruokapaketteja pakkaamassa
Moatti mánus Jan-Eerik Paadar ordnii gávcci čuorvvasgávppi ja ruhtačoaggima, mas čoggui oktiibuot sullii 10 000 euro. Dainna ruđain leat dolvon biebmopáhkaid boaittobeal gili obmuide. Govva: Paadar Images

Biebmopáhkaide leamaš duođalaš dárbu Paadar mielas.

Anárlaš fotogovvejeaddji ja fitnodatdoalli Jan-Eerik Paadar bijai johtui cuoŋománu álggus čuorvvasgávppi, mas son lea vuovdán ovtta fotogovvatávvala vahkus. Dain čoggon ruđaid lea son hálidan skeŋket boaittobeale gili olbmuid várás.

Okto son ii goittot guhká dárbbašan čoaggit ruđa go fárrui bohte earáge olbmot ja fitnodagat, geat hálidedje veahkehit koronadilis gillán olbmuid.

Moatti mánus Paadar ordnii gávcci čuorvvasgávppi ja ruhtačoaggima, mas čoggui oktiibuot sullii 10 000 euro. Son giitalage ovttat olbmuid, fitnodagaid ja giliserviid, mat vulge aktiivalaččat mielde dán prošektii. Ruđain leat ordnen olbmuide biebmoveahki.

– Eiddo čállen duos listá buohkain ja gal dat oalle guhki lei, máŋgalot nama. Hirbmat fiinna ášši, ahte olbmot vulge eaktodáhtolaččat fárrui veahkehit, čohkket biebmopáhkaid ja doaimmahit daid boaittobeal gili ássiide, rámiida Paadar.

Son árvala, ahte juohke gilis ledje sullii moaddelot dálu gosa biebmopáhkka dolvojuvvui uvssa duohkái.

– Deháleamos ii goittot orron olbmuid mielas leamen dat biebmopáhkka, muhto baicce dat, ahte gii nu bođii fitnat uvssa duohken. Olbmuide bođii dovdu, ahte gii nu berošta sis, smiehtada Jan-Eerik Paadar dál.

Jan-Erik Paadar
Hirbmat fiinna ášši, ahte olbmot vulge eaktodáhtolaččat fárrui veahkehit, čohkket biebmopáhkaid ja doaimmahit daid boaittobeal gili ássiide, rámiida Jan-Eerik Paadar. Govva: Eljas Niskanen / Yle

Dás duohko Paadar áiggu bidjat fas návccaidis iežas fitnodatdoaimma joraheapmái

Biebmopáhkaide leamaš duođalaš dárbu Paadar mielas. Son leage ožžon olu máhcahaga, mas olbmot leat giitalan su.

– Gal mun iešge lean ožžon dás olu buori alccen, lean beassan oahpásmuvvat ođđa olbmuide. Dat leamaš meastaba dat buoremus ášši dás, illuda Paadar.

Dán háve maŋimuš biebmopáhkaid dolvo vuossárgga Áŋŋela gili ássiide. Paadar hálida dál bidjat návccaidis iežas fitnodatdoaimma dorvvasteapmái.

– Min fitnodaga doaibma bisánii njukčamánu beallemuttus, dál áiggošin ovddidit dan, muhto iihan dan goasse dieđe maid dás vel hutká boahtteáiggis, dadjá Paadar.

Sosiálahoavda: Biebmoveahkki lea dehálaš dán dilis

Anára gieldda sosiálahoavda Jaakko Seppänen mielde biebmoveahkki lea dehálaš dál koronaáigge, eandalit boaittobeale guovlluin.

– Galhan dat lea guhki boaittobeale gili olbmuide vuolgit viežžat biebmopáhkaid dáppe gielddaguovddážis. Buorre, ahte leat olbmot, geat hálidit veahkehit nugo Jan-Eerik Paadar lea dahkan, dadjá Seppänen.

Jaakko Seppänen, sosiaali- ja terveysjohtaja, Inarin kunta
Buorre, ahte leat olbmot geat hálidit veahkehit nugo Jan-Eerik Paadar lea dahkan, dadjá Anára gieldda sosiálahoavda Jaakko Seppänen. Govva: Anneli Lappalainen / Yle

Gielda lea gártán dál veahkehit olbmuid ekonomalaččat. Seppänen muitala, ahte veahki bivdin lea lassánan.

– Olbmuin lea sáhttán fáhkka nuppástuvvat ruđalaš dilli ja mii leat mieđihan ovddalgihtii eastadeaddji áigáiboahtindoarjagiid.

Jan-Erik Paadar muitala iežas ruhtačoagginkampánjas duorastaga 28.5. Yle Olohuone -sáddagis, mii álgá diibmu 19 Yle TV2-kanálas.

Varrasamosat

Muualla Yle.fi:ssä