Sámepolitihkka |

Janne Näkkäläjärvi joatká Sámedikki válgalávdegotti jođiheaddjin

Janne Näkkäläjärvi válljejuvvui ovttamielalaččat joatkit Sámedikki válgalávdegotti ságadoallin. Muduige measta seamma válgalávdegoddi joatká vel nuppi baji.

Janne Näkkäläjärvi
Govva: Anneli Lappalainen / Yle

Sámedikki dievasčoahkkin válljii 21.6.2016 válgalávdegotti jagi 2019 sámediggeválggaid valmmaštallama ja lágideami várás.

Ságadoallin joatká Janne Näkkäläjärvi

Válgalávdegotti ságadoallin joatká Janne Näkkäläjärvi Eanodagas. Válgalávdegoddi vállje ieš várreságadoalli lávdegotti lahtuin.

Eará ságadoalleevttohasat čoahkkimis eai lean.

Näkkäläjärvi jođihii válgalávdegotti maid jagi 2015 válggain.

Lahttu ja várrelahttu juohke sámegielddas

Fásta lahttun válljejuvvojedje Janne Näkkäläjärvi Eanodagas, Birit-Anni Magga Soađegili gieldda Lappi bálgosa guovllus, Veikko Feodoroff Anáris (nuortalaččaid ovddasteaddji),  Jouni "Haikonen" Aikio Anáris (anáraččaid ovddasteaddji) ja Inga Guttorm (Oaptii-Iŋgá) Ohcejogas.

Sin persovnnalaš várrelahttun válljejuvvojedje Inker-Anne Magga Eanodagas, Jouko Hetta Soađegili gieldda Lappi bálgosa guovllus, Tauno Haltta Anáris (nuortalaččaid ovddasteaddji), Johanna Alatorvinen Anáris (anáraččaid ovddasteaddji) ja Aslak Pieski Ohcejogas.

Ná measta seamma válgalávdegoddi joatká, dušše Ohcejoga várrelahttu rievddai Maarit K. Pieskis Aslak Pieskin.

Oasis lahttuin ja várrelahttuin jienastuvvui. Loga Yle Sámi livečuovvumis mo jienasteamit manne.

Válgalávdegoddi válljejuvvui árabut go ovdal

Válgalávdegottis galgá leat lahttu ja várrelahttu juohke sámiid ruovttuguovllu gielddas ja lahtuid nammadettiin galgá čuovvut dásseárvolága njuolggadusaid nissoniid ja albmáid gaskasaš ovddastusas sierra doaibmaorgánain ja fuomášit ráđđehusa ávžžuhusa iešguđet giella- ja kultuvrajoavkkuid vuhtiiváldimis.

Sámediggi mearridii ovddit čoahkkimisttis ásahit válgalávdegotti dán válgabaji árabut go dábálaččat, jo jagi 2016 iige easka 2018. Čuovvovaš válggaid ordnejit jagi 2019.

Varrasamosat: Sámepolitihkka

Váldoođđasat

Varrasamosat

Muualla Yle.fi:ssä