Sápmi |

Jávreguollebivddus ráhkadit dieđihanfilmmaid – Ulbmil dieđihit ja hohkahit ámmáhii ođđa olbmuid

Kyelikietâ-prošeavtta ulbmil lea juohkit dieđu Davvi-Lappi guovllu ámmátguolástusas.

Risto Pyhäjärvi, meardi, Lokka-Porttipahta
Risto Pyhäjärvi lea ámmátguolásteaddjin Lokka-Porttipahta guovllus. Govva: Maiju Saijets / Yle

Lokkalaš Risto Pyhäjärvi lea eallenagi bivdán Eurohpá uniovnna stuorimus dahkujávrriin Lokka-Porttipahtas Soađegilis Davvi-Suomas. Su čehppodat ja dáiddut ámmátguolástusas leat divrasat go ámmátguollebivdiid dahjege gávppálaš guolástusvugiid dahket oahpisin Kyelikietâ-prošeavttas, mas ráhkadit guolástusvugiin videofilmmaid.

Risto Pyhäjärvi mielde guolástusvugiid gánniha govvet ja ráhkadit filbman go sin ámmát lea šaddamin vel ain hárvenabbon.

– Go guolásteaddjit boarásmuvvet, de sii sirdet mielas dieđuideaset nuorabuidda, dadjá Pyhäjärvi.

Filmmat leat sihke dieđihan- ja oahppomateriála

Kyelikietâ-prošeavtta ulbmil lea juohkit dieđu Davvi-Lappi guovllu ámmátguolástusas. Guolástusealáhusa mielde Sámis bivdojuvvon guolli johtá bures ja dasa leat oastit.

Maiddái guoli haddi lea buorre, muhto váttisvuohtan lea namalassii dat, ahte guollebivdit leat unnán ja daid hárve guolásteddjiid gaskkas leat vel uhcit nuorra guolásteaddjit.

Hauki, kala, Lokka-Porttipahta
Hávga lea okta dain Lokka-Porttipahta guliin, maid guolásteaddjit vuvdet ovddos guvlui. Govva: Maiju Saijets / Yle

Prošeaktakoordináhtor Markku Ahonen Lappi guolledoalu doaibmajoavkkus nanne Risto Pyhäjärvi dieđuid das, ahte guolásteaddjit leat boarásmuvvamin. Ahonen dadjá, ahte Lokka-Porttipahta ja Anárjávrri ámmátguolásteddjiid gaskaahki lea 56 jagi.

– Dili lea vehá buoridan dat, ahte moatti jagi siste Lokka-Porttipahtas leat álggahan golbma nuorra guolásteaddji maŋimuš moatti jagi siste, čilge Ahonen.

Vai basttášedje dieđihit ja hohkahit jávreguolástussii ođđa olbmuid, de dán geasi leat govvegoahtán iešguđetlágan bivdovugiid ja ráhkadišgoahtán dain filmmažiid. Filmmaid bokte lea ulbmil lea sirdit guolástusdieđu nuorabuidda ja oahpahit sierralágan guolástusvugiin. Videofilmmažiin áigot muitalit, ahte mo iešguđetlágan bivdosiid galgá geavahit guđege čázis.

Dássážii leat ovdamearkka dihte Lokka dáhkkujávrri alde govven bivddu hávgamerddiin ja guollehehkiin, dadjá Kyelikietâ-prošeavtta jođiheaddji Virpi Jääskö.

Virpi Jääskö
Virpi Jääskö jođiha Kyelikietâ-prošeavtta. Govva: Maiju Saijets / Yle

– Dáppe Lokka alde govvet hávgga ja vuoskku bivddu dán háve ja de maŋŋelabbos Anárjávrri alde buot daid gávppálaš vugiid maiguin olbmot bivdet guliid.

Lokkalaš ámmátguolásteaddji ja ovddeš guolástusa oahpaheaddji Tommi Jyly árvala, ahte guolástusvideot soitet ávkin nuorra guolásteddjiide.

Tommi Jyly lea ámmátguolásteaddji Lokka-Porttipahtas.
Tommi Jyly lea ámmátguolásteaddji Lokka-Porttipahtas. Govva: Maiju Saijets / Yle

– Nuorat oidnet, ahte makkár dat guolástusas lea ja mo daid bivdosiin galgá rassat, muhto praktihkashan dan buoremusat oahppá go ii guolástusa skuvllas oahpa muhto jávrri alde, Tommi Jyly dadjá.

Videot ráhkaduvvojit maiddái dálveguolástusas

Sullii 10 minuhta guhkkosaš videoid áigot ráhkadit oktiibuot guhtta. Prošeavtta jođiheaddji Virpi Jääskö mielde dán sullasaš oahpahusvideot eai jur leat ráhkaduvvon. Guolástusvugiid lassin fidnus áigot velá govvet dan, mo gávppálaš guolástusas gieđahallet guliid fatnasis ja guollehállas ovdalgo guolli vuolgá ostiide.

Fidnu lea ruhtaduvvon EU mearra- ja guolledoalloruhtaráju bokte. Fidnus leat mielde maiddái Sámi oahpahusguovddáš ja Anára ja Soađegili gielddat.

Fidnu bistá jagi 2019 cuoŋománu loahpa rádjái. Filmmaid lea ulbmil maŋŋelis bidjat oaidnin láhkai internehttii, dadjá prošeaktabargi Virpi Jääskö.

– In vel dieđe, ahte gos dárkilit, muhto gosa nu internehttii goittotge, Jääskö čilge.

Divvojuvvon 19.6.2018 dii 13.23: divvojuvvon tekstii, ahte Lokka-Porttipahta lea Eurohpa uniovnna stuorimus dahkujávri, ii Eurohpa

Varrasamosat: Sápmi

Váldoođđasat

Varrasamosat

Muualla Yle.fi:ssä