Sápmi |

Jávrri-Juhán Niillas digitaliseregoahtá eváhkkobáttiidis – "Aiddo maŋimuš áigi daid áimmahuššat"

Aikio lea 1990-logus bádden Deanuleagi, Ohcejoga ja Anára sápmelaččaid ságastallamiid eváhkkoáiggi birra.

Jietna: Niilo Aikio
Jietna
Jávrri-Juhán Niillas muitalii eváhkkobáttiid digitaliserenprošeavttastis Yle Sámi iđit -sáddagis gaskavahku 9.1.2019.

Girječálli ja doaimmaheaddji Jávrri-Juhán Niillas, Niilo Aikio lea fidnen Sámiráđis dán jahkái 70 000 Norgga kruvnnu (badjelaš 7 000 euro) prošeaktadoarjaga eváhkkobáttiid digitaliseremii.

Aikio lea 1990-logus bádden Deanuleagi, Ohcejoga ja Anára sápmelaččaid ságastallamiid eváhkkoáiggi birra. Sus almmustuvai dáid ságastallamiid vuođul 1998 girji eváhkkomátkkis ja dan váikkuhusain. Girjji namma lea Boaldimis báhtui: Suoma beale sámiid eváhkkomátki 1944–45:s ja sin Norgga beale ránnjáid vásihusat dáid áiggiid. Suomagillii seamma girji almmustuvai jagis 2000.

Sullii 65 olbmo muitalusat vurdet digitaliserema

Niilo Aikio báttiin leat sullii 65 olbmo muitalusat eváhkkoáiggis. Son muittuhage, ahte ii leat šat go moattis eallimin daid olbmuin, geaid son 1990-logus jearahalai. Son atná jearahallamiid divrrasin.

Aikio muitala, ahte dál álgá leat maŋimuš áigi digitaliseret báttiid.

– Lea ballu, ahte dat báttit álget raššut ja gánske billašuvvat. Dál dáidá leat aiddo maŋimuš áigi daid áimmahuššat.

Dárkkuhus lea, ahte iešguđetlágan doaibmit besset ávkkástallat digitála báttiiguin.

– Ulbmil lea, ahte dáinna ruđain báttiid sáhttá dál digitaliseret, ja ná rádjat ja maiddái ávkkástallat daid. Dat vuos bargo dat bargu, maid lean plánen ja das maŋŋá dat lea vejolaš gullat, geat daid báttiid hálidit geavahit ja ávkkástallat. Ja dađi mielde go lea dárbu, de mii sáhttit oktiiráđiid smiehttat ášši, Jávrri-Juhán Niillas muitala.

Varrasamosat: Sápmi

Váldoođđasat

Varrasamosat

Muualla Yle.fi:ssä