Sápmi

Jávrri-Juhán Niillasa mánáidgirji šaddá dohkkáteáhterčájálmassan – "Mun gal njuolgga ráhkástuvven Nigái"

Sápmelaš girječálli Jávrri-Juhán Niillas, Niilo Aikio noveallaráiddus lea boahtimin dohkkáteáhterčájálmas.

Nigá gávcci jagiáiggi
Nigá gávcci jagiáiggi Govva: Satu Muurinen

Ii leat dávjá, go beassá sápmelaš girječálliid buktagiidda vuođđuđuvvan dohkkáteáhterčájálmasa oaidnit. Dál goit dakkár lea olles fárttain boahtimin.

Jávrri-Juhán Niillasa, Niilo Aikio Nigá-noveallaráiddus ráhkaduvvon dohkkáteáhterčájalmas šaddá oaidninláhkái golggotmánus vuos Helssegis. Neavttár Ilpo Mikkonen muitalage, ahte olles čájálmas lea dahkkon lagaš ovttasbarggus ieš girječálliin.

Čájálmas sisttisdoallá olu musihka ja visualalaš elemeanttaid. Das lea maiddái váldojuvvon vuhtii Sámi gávcci jagiáiggi, go čájálmasa nammage dan juo muitala – Nigá gávcci jagiáiggi.

Ráhkástuvai Nigá-dohkkái dalán

Nigá-dohkká lea dieđusge garvodan gáktái. Unna giehtadohkás lea gahpir oaivvis, vuoddagiiguin giesastuvvon sistegapmagat julggiin. Leaba Nigá muitán gálssohiidge vai bivvá galbmasis.

Girječálli logai, ahte vaikke dohkká ii leat nu Nigá-hápmái, go son ieš oaidná, lea dohkká goittotge hui vuogas.

– Mun gal njuolgga ráhkástuvven Nigái, lohká Jávrri-Juhán Niillas dan birra, go vuosttaš geardde beasai oaidnit dohkáža.

Dohkkáčájálmas vuođđuđuvvá dán rádjái almmuhuvvon noveallaide, muhto lasi lea gal boahtimin. Aikio muitala, ahte goalmmát oassi lea su beales sihke sáme- ja suomagillii gárvvis, muhto dat vuordá vel sullii 25 gova dáiddáris.

Golggotmánus Helssegis

Čájálmasa vuosttašeahket lea Helssegis Malmintalos golggotmánu 4. beaivve eahkedis. Dohko girječálli ieš vuordá buohkaid, geaidda dat Helsset lea beare olamuttus ja áigu dieđusge maid ieš mannat geahččat, makkár čájálmasas lea loahpa loahpas šaddán.

Čájálmas lea suomagillii, muhto dat livčče gal juo jorgaluvvon sámegilliige. Neavttár Mikkonen sávváge, ahte olbmot almmuhivčče, jus sis lea beroštupmi čájálmassii ja eandalit dan sámegielat veršuvdnii.

Varrasamosat: Sápmi

Váldoođđasat

Varrasamosat

Muualla Yle.fi:ssä