Sápmi |

Jiekŋameara ruovdegeainnu loahpparaporta almmustuvai – Ii gánnit ruđalaččat, eaige evttot joatkkadoaimmaid

Jiekŋameara ruovdegeaidnu ii leat ruđalaččat gánnihahtti. Jus dan áigot ovddidit, dat gáibida politihkalaš mearrádusa.

Kuvamanipulaatio. Toteutuessaan rata halkoisi yhteensä kuusi saamelaispaliskuntaa Sodankylän ja Inarin alueilla.
Mearrádus ruovdegeainnu huksemis ii leat dahkkojuvvon ii Suomas iige Norggas. Plánema álggaheapmi gáibidivčče politihkalaš mearrádusa guktuid riikkain. Govva: Yle Sápmi

Jiekŋameara ruovdegeainnu loahpparaporta lea almmustuvvan. Suoma ja Norgga gaskasaš čielggadanbargojoavkku bargun lei čielggadit Jiekŋameara ruovdegeainnu huksema eavttuid. Bargojoavku čielggadii vejolaš ruhtadanvugiid, plánen- ja lohpemeannudemiid ja biras- ja sámegažaldagaid.

Mearrádus ruovdegeainnu huksemis ii leat dahkkojuvvon ii Suomas iige Norggas. Plánema álggaheapmi gáibidivčče politihkalaš mearrádusa guktuid riikkain.

Ii velge ruđalaččat gánnihahtti prošeakta

Loahpparaporttas čielgá dat, mii ovdalge leamašan dieđus. Jiekŋameara ruovdegeaidnu ii leat ruđalaččat gánnihahtti makkárge mihttáriin. Jus ruovdegeaidnu galggašii leat gánnihahtti ruđalaččat, dan bokte galggašii bastit fievrredit 2,5 miljovnna tonna veardde gálvvuid, ahte fievrridandietnasiin mávssášedje ruovdegeainnu. Dákkár fievrredanmearit eai leat realisttalaččat.

Maiddái turismabeali váikkuhusaid ruovdegeidnui leat čielggadan. Turismaruđainge ruovdegeainnu eai bastte ruhtadit, iige turisma leat doarvái stuorra ágga huksemii.

”Jus fidnu ovddiduvvo, ferte sihkkarastit, ahte sámit besset oasálastit”

Loahpparaportta dieđáhusas čállojuvvo, ahte davi hearkkes ja áidnalunddot luondu gáibida sierra fuomášumi. Ruovdegeainnus livčče máŋggalágan váikkuhusat birrasii ja sápmelaččaide. Jus fidnu mearridit ovddidit, de sámiid oasálastin galggašii sihkkarastojuvvot, amaset bissovaččat bilidit sámiid ealáhusaid ja kultuvrra.

Guovddážis lea, ahte sámit, boazodoallit ja earát, geaidda fidnu váikkuhivčče, galggašedje oasálastit plánenprosessii álggu rájes.

”Jiekŋameara ruovdegeainnu plánen ja huksen bisttášii unnimusat 15 jagi”

Nu Suomas go Norggasge plánen- ja lohpeproseassa lea guhkki. Riikkaid gaskas maiddái gávdnojit erohusat. Jus ruovdegeainnu plánema jotket, fertešii čielggadišgoahtit mo plánenproseassaid heivehit oktii.

Nu Suomas go Norggas leat álggaheamen johtolatplána, mii ollá čuovvovaš 12 jahkái. Dat bidjá dihto eavttuid ruovdegeidnui, dasgo dan galggašii heivehit guktuid riikkaid plánaide. Jiekŋameara ruovdegeainnu plánen ja huksen bisttášii unnimustá 15 jagi.

Suoma johtolat- ja diehtojuohkinministeriijajođihii dán bargojovkui ja dasa oassálaste Suomas birasministeriija,Johtolatdoaimmahat, Lappi lihttu, Lappi EBI-guovddáš, Lappi guovlluovttasbarggugieldaovttastupmi, sámediggi, Nuortalaččaid siidačoahkkin sihke Norggasjohtolat- ja gulahallanministeriija, Ruovdegeaidnohálddahus, Finnmárkku guovlluovddasteaddjit ja sámediggi. Barggus gulle maiddái eará čanusjoavkkuidovddasteaddjiid. Joavkku doaibmaáigodat lei 9.5-14.12.2018.

Varrasamosat: Sápmi

Váldoođđasat

Varrasamosat

Muualla Yle.fi:ssä