Sápmi |

Jiekŋameara ruovdegeainnu ovddidit ain priváhta ruhtademiin: čohkkejit áššis lasi dieđu, ovdalgo ságastallagohtet sápmelaččaiguin

Peter Vesterbacka bargoguoibmi Kustaa Valtonen muitala, ahte fidnu ovddidit friija áigetávvaliin.

Peter Vesterbacka allekirjoittaa aiesopimuksen Jäämeren radan suunnittelusta ja toteutuksesta Arctic Business Forumissa Rovaniemellä 9. toukokuuta.
Peter Vesterbacka vuolláičálii áigumušsoahpamuša Jiekŋameara ruovdegeainnu plánemis ja ollašuhttimis Arctic Business Forum -dáhpáhusas Roavvenjárggas 9.5.2019. Govva: Juha Mäntykenttä / Yle

Peter Vesterbacka bargoguimmiinis Kustaa Valtoneniin lea ain ovddideamen Jiekŋameara ruovdegeainnu sudno Finest Bay Area Development -oasusfitnodaga bokte.

Dán muttus fitnodat lea ráhkadeamen nu gohčoduvvon business case -árvvoštallama, masa rehkenastet fidnu goluid ja ávkkiid.

– Leat čohkkemin dieđu ja figgat dahkat analysa das, maid gánneha bargat ja mii lea jierpmálaš ollisvuođa dáfus, dego makkár johtolatmeriid sáhttit vuordit, mo doppe sáhtášii johtit, makkár bálvalusat ruovdegeidnui laktásivčče ja makkár goasttádusat ja hattit livčče, muitala Kustaa Valtonen.

Ruovdegeaidnoplánaid leat ovddideamen Valtonen sániiguin "friija áigetávvaliin". Čanusjoavkkuiguin eai leat vel ságastallagoahtán. Sápmelaččaiguin áigot ságastallat dan maŋŋá, go vuos leat čohkken lasi dieđu fidnu várás.

– Giđđat sápmelaččat reagerejedje oalle nannosit ja gávnnaheimmet, ahte ságastallama ii gánnet čađahit dovdduid vuođul. Millosabbot ságastallat duohtaáššiid vuođul. Danin háliidat vuos čohkket dieđu vai áddet dili buorebut ja máhttit vástidit sápmelaččaide buorebut, čilge Valtonen.

Plánat bohciidahttet fuola

Miessemánus 2019 fitnodatalmmái Peter Vesterbacka almmuhii Jiekŋameara ruovdegeainnu plánemis ja ollašuhttimis priváhta ruhtademiin.

Plánat hirpmástuhtte Sámis. Dat leat bohciidahttán fuola erenoamážit Sámi luonddu ja boazodoalu beales. Maŋimuš háve áššis ságastalle gaskavahku Roavvenjárggas dollon birasdialogat-ságastallandilálašvuođas. Maailman kuvalehti almmustahtii maid gaskavahku áššis viiddes artihkkala.

Kustaa Valtonen lohká sin áddet sápmelaččaid fuola. Son oaivvilda, ahte sápmelaččat eai leat kánske ádden sin teknihkalaš čehppodaga ruovdegeainnu ollašuhttimis. Dainna son čujuha iešguđetlágan tunneliidda, šaldiide ja ruovdegeainnu loktemii eatnama bajábeallái.

Čuvvot eanagoddeláva ovdáneami

Stáhta mearridii jo giđđadálvve, ahte dat ii ovddit šat ruovdegeainnu Sápmái. Fidnu eai gávnnahan gánnehahttin. Lappi lihttu goit mearridii bisuhit ruovdegeainnu Sámi eanagoddelávas.

Lávvaevttohus lea dál sáddejuvvon eiseválddiide cealkinláhkai. Álbmot beassá oaidnit ja kommenteret plána čakčat 2020. Maŋimuš divodemiid maŋŋá Lappi lihtu stivra gieđahallá lávvaevttohusa loahppajagi 2020.

Kustaa Valtonen muitala, ahte sii čuvvot lávvaproseassa, muhto eai leat oassálastán dasa iežaset cealkámušaiguin.

Varrasamosat: Sápmi

Váldoođđasat

Varrasamosat

Muualla Yle.fi:ssä