Sápmi |

Johan Ailo Kalstad válljejuvvon NRK Sámi ođđa hoavdan

Guovdageaidnulaš Johan Ailo Kalstad (42) lea válljejuvvon NRK Sámi ođđa direktevran ja son lea mielde maid NRK bajimus jođiheaddjijoavkkus. 

Johan Ailo Kalstad
Guovdageaidnulaš Johan Ailo Kalstad lea bargan maŋimuš jagiid Sámi allaskuvlla direktevran, gos lea bargan 2017 rájes. Govva: ÁRVU/MARIE LOUISE SOMBY

NRK Sámi ođđa hoavdan lea válljejuvvon Johan Ailo Kalstad.

– Mun illudan sakka álgit virgái, ja ovttasbargat ja oahpásnuvvat buot NRK Sámi ja olles NRK ollu čeahpes mielbargiiguin. Anan dán barggu hui mávssolažžan ja šaddá hirbmat somá oaidnit maid sáhttit ovttas nagodit olahit, Kalstad cealká NRK Sámi dieđáhusas.

Son illuda beassat ovddidit NRK Sámi fálaldagaid ain ovddosguvlui.

– Olles NRK:as ja earenoamážit NRK Sámis lea hui dehálaš servodatdoaibma čadnon sámegielaid ja sámi kultuvrra ja servodateallima seailluheapmái ja ovdánahttimii. Mun duođai háliidan leat fárus dán deavdime buori vuogi mielde ja NRK Sámi ovdánahttit ain viidáseappot, Kalstad lohká NRK Sámi dieđáhusas.

Kalstad lea bargan maŋimuš jagiid Sámi allaskuvlla direktevran, jagi 2017 rájes. Kalstad lea ovdal bargan maid earret eará Geelmuyden Kiese, Statkraft ja NRK Sámi ovddas.

Maŋemus jagiid sus leat maid leamaš olu stivradoaimmat, earret eará Ávviris, RiddoDuottarMuseain ja Davvi-Norgga universitehtabuohcceviesus. Kalstad lea studeren journalistaoahpu Sámi allaskuvllas ja siviilaekonomiijaoahpu Norgga gávpeallaskuvllas.

NRK Sámi ovddeš hoavda lei Mona Solbakk, guhte álggahii NRK Sámi hoavdan 2015. Solbakk bargá dál NRK Sámis doaimmahuslaš prošeavttaiguin Tromssas.

Varrasamosat: Sápmi

Váldoođđasat

Varrasamosat

Muualla Yle.fi:ssä