Sápmi |

Johtolatministtar Berner ii máhte dadjat, ráđđádallogo sámedikkiin Jiekŋameara ruovdegeainnus vuos

Johtolat- ja diehtojuohkinministtar Anne Berner ii máhte vel lohkat, ráđđádallogo sámedikkiin vel dán čielggadanfidnus.

Anne Berner eduskunnassa 22. helmikuuta 2017
Govva: Antti Aimo-Koivisto / Lehtikuva

Johtolat- ja diehtojuohkinministeriija muitalii maŋŋebárgga, ahte lea bivdán Johtolatdoaimmahaga čielggadit ovttasbarggus Norgga johtolateiseváldiiguin vejolaš Jiekŋameara ruovdegeainnu ollašuhttima ja ekonomalaš gánnáhahttivuođa.

Johtolat- ja diehtojuohkinministtar Anne Berner (olg.) ii máhte lohkat, ráđđádallogo sámedikkiin vel dán čielggadanfidnus.

Sámediggelága ráđđádallangeatnegasvuohta gáibida stáhta ráđđádallat sámedikkiin áššiin, mat gusket erenomážit sámeguovllu.

– Láhkaásaheami gáibádusat čuvvojuvvojit ja eiseváldedásis lea gávnnahuvvon namalassii ráđđádallangeatnegasvuohta. Dán muttus ii leat vel dutkojuvvon, guoskágo dát ráđđádallangeatnegasvuohta dán čielggadeami, Berner lohká.

– Dát lea proseassa álgomuttu čielggadanbargu ja áššiin ráđđádallo maŋimustá proseassa máŋimuš muttuin, jos fidnu ovdána, Berner lohká.

Boazodoallu goit mielde čielggadeamis

Čielggadusbivdaga mielde barggu galggašii čađahit ovttas Norgga ruovdegeaidnoeiseváldiin ja atnit ávkin Davviriikalaš ruovdegeaidnodoaimmahagaid ovttasbargoforuma. Bargu galggašii leat gárvvis 28.2.2018.

Ministtar Berner muitala, ahte sámeguovllu ealáhusain ja eanageavaheamis goit boazodoallu lea mielde Johtolatdoaimmahaga čielggadanfidnus.

– Johtolatdoaimmahaga mielde boazodoallu váldo mielde čielggadeapmái, Berner dadjá.

"Viiddis geahččanguovllus Jiekŋameara ruovdegeaidnu laktása eará stuorra fidnuide"

Ministtar Berner oaidná Jiekŋameara ruovdegeainnu oassin stuorát johtolatollislašvuođa.

– Dáin fidnuin ferte bargat ovttasbarggu eará riikkaiguin. Jiekŋameara ruovdegeainnu galggašii oaidnit oassin stuorra johtolatfierpmádagas ja viiddis geahččanguovllus Jiekŋameara ruovdegeaidnu laktása eará stuorra fidnuide, dego Rail Balticai ja Helssega ja Tallinna gaskasaš tunellii. Ruovdegeaidnu sáhtášii leat oassin dán johtolatfierpmádagas, Berner lohká.

Johtolat- ja diehtojuohkinministtar muittuha, ahte Jiekŋameara ruovdegeainnus ii leat dahkkojuvvon sisriikkalaš huksenmearrádus.

Sámediggi gáibida beassat ráđđádallamiidda

Ságadoalli Sanila-Aikio muittuha, ahte ná stuorra proseassas Sámediggi berrešii leat álggu rájes mielde. Dál goit nu ii leat leamaš.

– Dat lea dan mađi stuorra proseassa, de Sámediggi ferte leat áibbas álggu rájes dakkár proseassas fárus ja beassat oassálastit dan ovddideapmái diená, ahte min oaidnu boahtá oidnosii ja dat váldet dan vuhtii, Sanila-Aikio lohká.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä