Sápmi |

Johtti Rádio johttá fas – dán vahkus geasseságat gullojit Ohcejogas

Yle Sámi rádiokanálas gullat geasi áigge Johtti Rádio álo maŋŋebárgga, gaskavahku ja duorastaga.

Doaimmaheaddji guoktá Outi Paadar ja Laura Pieski johtiba dán vahkus Ohcejoga guovllus.
Doaimmaheaddjiguoktá Outi Paadar ja Laura Pieski sáddeba Johtti Rádio dán vahkus Ohcejogas ja Gáregasnjárggas. Govva: Linnea Rasmus / Yle

Doaimmaheaddjiguoktá Outi Paadar ja Laura Pieski johtiba dán vahkus Ohcejoga guovllus, go Yle Sámi Johtti Rádio vuolgá vuot johtui.

Yle Sámi rádiokanálas gullat geasi áigge Johtti Rádio álo maŋŋebárgga, gaskavahku ja duorastaga Dearvva-sáddagis diibmu 14.30–16.00. Johtti Rádios doaimmaheaddjit johtet guđa vahku áigge miehtá Suoma ja sáddejit njuolggosáddagiid muhtin sajis Suomas.

Johtti Rádio geassi álgá maŋŋebárgga Ohcejogas Gieddemiellis dahjege Busteldearpmis (su. Onnelantörmä). Sáhka šaddá ovdamearkka dihtii gili čorgendáhpáhusas. Guossin finasta maiddái Kati Eriksen, guhte muitala earret eará Sámi musihkkaakademiija dearvvuođaid.

Gaskavahku Johtti Rádio sádde sáddaga Ohcejoga girkostobuid luhtte ja duorastaga dat dolle Gáregasnjárgii.

Geasi áigge johtit maiddái Eanodaga, Oulu, Roavenjárgga ja Soađegili guovlluin.

Eanet Yle Sámi geasseáiggi birra sáhtát lohkat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä