Sápmi |

Jorggugávttet flash mob Kiasmas lávvardaga – “Háliideimmet muittuhit man ollu Grind-video bávččagahttá”

Njeallje sámenuora lávkestedje sisa lávvardaga beaivit Kiasmai geahččat Grind-filmma jorggugávttiiguin. Sii čohkkánedje láhttái čállit iežaset dovdduid birra, maid video bohciidahtii.

Flash mob Kiasmas
Govva: Helga West / Yle

Váiban, behtton, vuollánan, šlundon. Dákkár dovddut bohciidahtte, go sámeaktivisttaid joavku čoahkkanii lávvardaga beaivit Kiasmai, Helssegii, geahččat Jenni Hiltunen Grind-dáiddafilmma, mii lea badjánan ságastallamii dán giđa.

Grind lea njealji minuhta guhkkosaš videodáiddafilbma, mas nissonat jorahit bađaid ja dánsot almmáiolbmuid fakegávttiiguin jamaikalaš dánsalihkadusain.

Performánsa buoremus vuohki oažžut fuopmášumi

Suoma Sámi nuoraid -searvvi čálli ja aktivista Petra Laiti lea okta sis, guhte dovdá iežas loavkašuvvan video dihtii, go das geavahuvvo fakegákti, vaikko Hiltunen ieš lohká, ahte dáidagis ii leat gažaldat sámevuođas.

Petra Laiti
Petra Laiti Govva: Kirsti Länsman / Yle

Petra Laiti ii leat dáiddáriin ovtta oaivilis. Su mielas ii Hiltunen, iige Kiasmage, oaččo mearridit, mo video galgá dulkojuvvot ja vuostáiváldit.

– Mii leat čállán Kiasmai máhcahusa dán video birra, muhto das ii leat leamašan makkárge ávki. Mii smiehtaimet, ahte dákkár spontána ja ráfálaš flash mob lea áidna vuohki muittuhit Kiasma, ahte Grind bávččagahttá, čilge Laiti.

Flash mob ii leat agressiivalaš miellačájáhus, baicce ráfálaš dáhpáhus mii lea ovddalgihtii sohppojuvvon joavkku olbmuid gaskkas.

Kiasma bargit eai liikon flash mobbii

Njeallje sámenuora lávkestedje sisa Kiasmai geahččat Grind-filmma – jorggugávttiiguin. Sii čohkkánedje láhttái čállit dovdduid birra, maid video bohciidahtii. Čállosiid sii bidje dasto láhttái vai buohkat museaguossit oainnášedje daid. Sii ledje jiena jávohaga. Maŋŋá sii bidje iežaset čállosiid oidnosii seaidnái, masa museaguossi oažžu guođđit iežas dearvvuođaid.

Museaguossit eai boahtán háleštit aktivisttain, muhto baicce Kiasma bargit, geat eai liikon flash mob -performánsii .

– Muhtin bargi bođii min lusa ja dajai, ahte dat maid mii bargat ii leat lobálaš, vaikko mii dušše čohkkáimet! Son maid dajai, ahte áigu álgit čielggadit dán min doaimma, imaštallá Laiti.

Kiasma bargiid máhcahusas bázii váivves miella Laitii, muhto ii son gal hálit álgit dan dihtii protesteret Kiasma iige Grindage.

– Ii dat leat sin sivva, ahte eai ádde, maid sii barget. Min ulbmil lei giddet sin fuopmášumi, muhto lea váttis dadjat, leigo dás makkárge váikkuhus sidjiide, smiehtada Laiti.

Buoremus čoavddus su mielas livččii, ahte Kiasma geasášii eret Grind-filmma čájáhusas.

Geahča video SSN facebook-siiddus.

Divvojuvvon 11.9.2016 diibmu 15:19: Ii lean Kiasma intendeanta gii lei boahtán nuoraid lusa muhto baicce muhtin bargi Kiasmas

Varrasamosat: Sápmi

Váldoođđasat

Varrasamosat

Muualla Yle.fi:ssä