Sápmi |

Juoigi guoktá illudeaba – “Livčče somá, jus KEiiNo ja Jon Henrik Fjällgren goappašagat livččiiga Eurovision-gilvvuin"

Sámemusihkka beaggá Eurovision-musihkkagilvvuin sihke Ruoŧas ja Norggas.

Mattis Simonsen Hætta , Åse Márgget Anti.
Mattis Hætta ja Åse Márgget Anti leaba hui movtta go juoigan beaggá máilmmiviidosaš lávddis. Govva: NRK ja Åse Márgget Anti.

Luohti lea fas oidnosis dán jagáš Eurovision-gilvvuin. Mannan vahku loahpas čielggai, ahte Norga sádde Eurovision-lávlungilvvuide Israelii KEiiNO-joavkku bihtáin Spirit in the Sky. Bihtás gullo maid luohti.

Maiddái Ruoŧas sámi artista gilvvohallá Eurovision-báikkis árbevirolaš sámemusihkain, go Jon Henrik Fjällgren lea mielde Melodifestivalen 2019 -gilvvus, mas válljejit Ruoŧa ovddasteaddji. Fjällgren bihtás Goeksegh gullo máttasámi vuolien.

Luohteberošteaddjit, juoigi guoktá Mattis Hætta ja Åse Márgget Anti, oaivvildeaba, ahte sámi artisttaid oidnon stuorra lávddiin lea earenoamáš buorre ášši, mii lokte árbevirolaš sámemusihka árvvu ja dahká luođi dovddusin miehtá máilmmi.

Vuosttas sámi Eurovision-artista, Simmona Máhtte, Mattis Hætta lea hui rámis go guovdageidnolaš Fred René Buljo beassá ovddastit Norgga KEiiNO-joavkkuin.

– Dat lea earenoamáš ja muitala, ahte máilbmi lea fuomášan sámi kultuvrra, ja dan man hearvás ja rikkis kultuvra mis lea. Dat lea nu issoras suohtas, Hætta illuda.

Simmona Máhtes lea nana jahkku sámi artisttaid birgemii máilmmiviidosaš arenain. Jáhku lea nu nanus, ahte sávvá maid Ruoŧa válljet Eurovision-musihkkagilvui sápmelačča ovddasteaddjin, go Ruoŧa Melodifestivalen 2019 -loahppagilvvus lea mielde Jon Henrik Fjällgren. Son lea okta dan 12 gilvvohallis, geat geahččalit faskkastit báikki Ruoŧa ovddasteaddjin Israelii.

– Suohtas lea vel datge, ahte Jon Henrik Fjällgren boahtá Ruoŧas vuoitit lullisámi vuoliein. Eurovision-finálas sáhttet guokte sápmelaččat, dakkár gal ii leamaš ovdal ja dat livčče hui earenoamáš, einnosta Simmona Máhtte.

Jáhkká beaggima lasihit juoiganmovtta

Åse Márgget Anti lea maid čuvvon medias sámi juigiid bálgá stuorra álbmoga dihtosii ja Eurovision-lávdái.

Anti ássá dán áigge mearrasámiid ássanguovllus ja son lea fuomášan man rašes dilis luohti lea dáin guovlluin. Anti sávvá, ahte sámemusihka beaggin movttiidahtašii maid daid guovlluid sápmelaččaid, gos luohti ii gullo šat nu ollu.

–Sávan, ahte luođi árvu nannejuvvo ja ahte mearrasápmelaččat maid dovdet, ahte dat lea oassi sin kultuvrras.

Anti lea ieš hui guhká bargan luđiin ja juoigamiin. Son lea vuođđudan maid Juoiganmokta Facebook-joavkku, mainna geahččala movttiidahttit olbmuid juoigat. Anti dadjá, ahte luohti lea dakkár, mii guoddá dieđuid ja čájeha olbmo gullevašvuođa kultuvrii ja báikái. Muhtimin árgabeaivválaš dáhpáhus sáhttá čájehit luođi fámu, oaivvilda Anti ja muitala dáhpáhusas, mii sutnje dáhpáhuvai gieskat.

– Ledjen Romssa guovllus goargŋumin hissain várrái ja de mus bođii dakkár ballu. Dat lei miellagiddevaš, go dan hissas ledje maid earát, geat balle. Go mun álgen jitnosit juoigat, de dat jeđđii ja sollii, eatge mii muitán šat ballat.

Guldal eanet luohte- ja Eurovision-ságaid Ásllaga Á-studio sáddagis Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä