Sápmi |

Juovlakaleandariin juohká dieđuid sápmelaččaid historjjás – vuosttaš luŋkka mielde juo dološ romalaččat namuhedje davvi álbmoga

Sonja Tanhua lea álggahan juovlakaleandara Twitterii, masa son čállá dieđuid sámiid historjjás sámi geahččanguovllus.

Oulun yliopiston väitöskirjatutkija Sonja Tanhua
Sonja Tanhua lea ieš beroštuvvan historjjás ja dat lea su váimmu lahka. Govva: Sara Wesslin / Yle

Oulu universitehta nákkosgirje- ja historjádutki Sonja Tanhua lea álggahan juovlakaleandara Twitter-bálvalussii, man namma lea Davvi historjá sámi geahččanguovllus.

Juovlakaleandarii Tanhua čállá oanehis teavsttaid sámiid historjjás. Maŋŋebárgga 1.12. rahppui vuosttaš luŋka juovlakaleandaris. Vuosttaš luŋkkas Tanhua muitala, ahte juo dološ romalaččat nappo Tacitus namuhii davvi álbmoga, sápmelaččaid.

– Oassi luŋkkain leat plánejuvvon gárvvisin, muhto oassi lea ain rabas, maid visot mii gieđahallat ja oaidnit duon mu juovlakaleandaris, dadjá Tanhua.

Oaččui ieš jurdaga

Jurdaga kaleandarii son fuomášii ieš, go historjá lea su váimmu lahka. Tanhua lea vásihan, ahte sápmelaččaid historjjás eai dieđe sámeguovllu dahje akademalaš birrasa olggobealde.

– Jurddašin, ahte manne in barggašii dákkára, go mus lea dasa beroštupmi ja máhttu. Smávva dieđut olbmuide álkit olahanláhkai.

Juovlakaleandar ovdána kronologalaččat ja Tanhua oažžu veahki bargoskihpáriin kaleandara ollašuhttimis.

– Váldoášši livččii dakkár, ahte muitalivččen ja čálašin sápmelaččain ja sámiid historjjás nu máŋggabealagit go vejolaš. Lean duos muhtun kollegain juo jearran veahki, jus sis boađášii juoga dohko. Mis leat dás giela dutkit ja eará kulturdovdit, geain sáhtášii oažžut veahki, muitala Tanhua.

Vel dál Tanhuas ii leat diehtu, almmustahttágo son juovlakaleandara muhtun eará lávddis Twittera lassin. Tanhua mielas Twitter bokte son olaha bures olbmuid, geat háliidit čuovvut ja lohkat juovlakaleandara.

Juovlakaleandar lea suomagillii ja dan gávnnat dáppe.

Nákkosgirje- ja historjádutki Sonja Tanhua lea ráhkadan juovlakaleandara Twitter-bálvalussii, masa son almmustahttá dieđuid sámiid historjjás sámi geahččanguovllus juohke beaivve gitta juovlaruohta rádjai. Jietna: Anja Kaarret / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä