Säämi

Juovlâkoortâ finnim puáhtá leđe merhâšittee äšši elilâm ulmuid – Juovlâpoostâ elilâm ulmuid -kampanjast halijdeh mušteđ sii

Video: joulukorttityöpaja
Taan ohhoost Avelist láá lamaš pargopääjih, moin ulmuuh láá puđâldâm juovlâkoortâid elilâm ulmuid. Aanaar kieldâ lii ohtâ tain paijeel 100 kieldâst, moh láá mieldi Juovlâpoostâ elilâm ulmuid -nommâsâš kampanjast. Tääl elâččep keččâmin mii juovlâkorttâpargopääjist tábáhtuvá. Video: Anneli Lappalainen ja Kirsti Länsman / Yle

Aanaar kieldâ lii vuossâmuu tove mieldi Juovlâpoostâ elilâm ulmuid -nommâsâš kampanjast.

AVVEEL Avelist Ainolast ivnáás juovlâkorttâvuáđuh, lijmeputtâleh já skerreeh láá liäbbud peevdij alne. Forgâ juovlâkorttâ lii vaalmâš já juovlâmáánust tot ilosmit kiännii elilâm ulmuu.

Riijkâvijđosâš Juovlâpoostâ elilâm ulmuid -nommâsâš kampanja puávdee Aanaar kieldâ ässeid vuolgâttiđ juovlâkoortâid elilâm ulmuid, kiäh láá päikkitipšoost teikkâ palvâlemaassâmviäsu ässeeh. Taat kampanja lii tääl joođoost paijeel čyeti päikkikoddeest Suomâst, já Aanaar kieldâ uásálist kampanjan tääl vuossâmuu tove.

Anette Leppäkangas, Ivalo
Aanaar kieldâ sosiaalstivrejeijee Anette Leppäkangas mielâst tággáár kampanja lii tehálâš. Sun lii jieš-uv puđâldâm koortâ elilâm ulmui. Govva: Anneli Lappalainen / Yle

Avelist juovlâkoortâid puáhtá puđâldiđ meid oovtâst iärásijguin. Aanaar kieldâ sosiaalstivrejeijee Anette Leppäkangas lii stivriimin juovlâkorttâpargopääji Ainolast. Teehin puáhtá puáttiđ puđâldiđ koortâ, jis veikkâ pääihist iä lah amnâseh koortâ puđâldem várás. Leppäkangas illood kampanjast.

– Tothân lii ain tehálâš, ete mij pyehtip moinniinaalijn pyehtiđ já meid levâttiđ juovlâilo já tääl eromâšávt nuuvt, et mij ilosmittep elilâm ulmuid, iätá Leppäkangas.

Sasu Kukkonen, Ivalo
Avveellâš Sasu Kukkonen puuđâld juovlâkoortâ elilâm ulmui. Sun ij tieđe kiäs tot mana. Govva: Anneli Lappalainen / Yle

Avveellâš Sasu Kukkonen čuáppá skerrein mučis heervâ ruánáá juovlâkoortân. Suu mielâst lii tehálâš mušteđ elilâm ulmuid já juovlâkoortâ puđâldem ij lah suu mielâst liijkás stuorrâ hommá.

– Jiem kale lah mihheen juovlâulmuid lamaš ovdil, mutâ tot lii tääl muttum já onnáá peeivi lii uáli suotâs finniđ koortâid já vuolgâttiđ taid.

Verena Kortelainen, Ivalo
Aanaar kieldâ pyereestvaijeemkoordinaattor Verena Kortelainen muštoot, et uccâ tavoin puáhtá leđe stuorrâ merhâšume. Govva: Anneli Lappalainen / Yle

Aanaar kieldâ pyereestvaijeemkoordinaattor Verena Kortelainen muštâl mondiet Aanaar kieldâ haalijd uásálistiđ kampanjan.

– Kampanjast puáhtá uccâ tavoiguin finniđ ennuv pyere ááigán já taggaar tobdo elilâm ulmuid, et perustep já muštep sii. Uccâ tavoiguin puáhtá leđe stuorrâ merhâšume.

Vaalmâš juovlâkoortâid puáhtá tuálvuđ ovdâmerkkân kirjeráájoid, kirjebussin teikkâ Ainolan, muštâl Kortelainen. Tärkkilub ravvuid kaavnah Aanaar kieldâ nettisiijđost.

Varrasamosat

Muualla Yle.fi:ssä