Sápmi |

Juovlasesoŋŋa lea álgán Heahtás – “Okta charter buktá máŋgalogi duhát euro”

Vahkuloahpas seivo vuosttas olgoriikkalaš girdimašiinnat Heahtá girdigieddái. Olles dálvvi áigge dat bibmet miljovnnain Eanodaga guovllu.

Hannu Autto on Enontekiöön kehityksen toimitusjohtaja.
Eanodaga gieldda ovddidanfitnodaga jođiheaddji Hannu Auttos geassá álkit moji go geahččá vuosttas chartera seaivuma. Govva: Vesa Toppari / Yle
Eanodat

Ovnnesjávrri alde okta hoigá muohttagiid vai turisttat besset luoittihit spárkkaiguin miehtá jieŋa, nubbi cegge lávu, goalmmát dihkkáda máđii, gos turisttat besset vuodjit mohtorgielkkáin.

Vahkuloahpas seivo vuosttas juovlacharterat Heahttái. Fitnodatdoalliide juovlamánu álggus lei okta ođđa hástalus mainna sii buncot, muitala Jussantupa vuovdalanhoavda Petri Niemi.

– Jáhkkimis šaddá gal hoahppu. Olu leat boahtimin olbmot. Muohta lea unnán ja dat vel barggaha juste ovdal sesoŋŋa, muitala Niemi.

Petri Niemi on Hotelli Jussantuvan markkinointisihteeri.
Hotealla Jussantupa vuovdalanhoavda Petri Niemi muitala, ahte ovtta beaivvis sis sáhttet fitnat measta 500 guossi. Govva: Vesa Toppari / Yle

Juovlamánus muhtun beivviid Ovnnesjávrri alde sáhtte čomistit máŋggat čuođit olbmot. Dábálaččat go charter seaivu, mátkkálaččat bohtet girdigiettis deike mohtorgielkkáiguin ja dasto suohtastallet moadde diimmu ovdamearkka dihte Vuollikka-nammasaš báikkis.

– Midjiide bohtet juohke beaivve okta dahje guokte girdimašiinna dievva olbmot. Mis sáhttet leat dáppe hávil measta 500 olbmo. Olles juovlamánuhan dat charterat johtet, govvida Niemi sin sesoŋŋa.

Okta charter buktá máŋgalogi duhát euro, olles sesoŋŋa máŋga miljovnna

Eanodaga gieldda ovddidanfitnodaga jođiheaddji Hannu Auttos geassá álkit moji go geahččá vuosttas chartera seaivuma. Girdi buvttii máŋga čuođi olbmo Humberside-girdigiettis Eanodagas. Juovlasesoŋŋa lea Eanodaga guovllu fitnodagaide dehálaš áigi.

– Gaskamearálaččat okta charter buktá deike máŋgalogi duhát euro. Dat lea dieđusge gitta das, man guhká guossit leat dáppe, čilge Autto.

Heahttái seaivvui dán sesoŋŋa vuosttas charter 30.11.2018.
Heahttái seaivvui dán sesoŋŋa vuosttas charter 30.11.2018. Govva: Vesa Toppari / Yle

Heahtá bás girdigiettážii eai seaivvo charterat dušše ovdalaš juovllaid, baicce muhtun girdit bohtet velá njukčamánusge. Lasige šiehtašedje, dasgo unna gieldda fitnodagaide olgoriikkalaš guossit leat stuorra dienas.

– Olles dálvvi dienas lea 4,2 miljovnna euro. Dat lea stuorra ruhta dán gildii gos eai asa oba guokteduhát olbmoge, muitala Autto.

Áiguba viehkaláhkai skievttidit ruđa

Oappážagat Nicola ja Julia leaba vuolgán Sápmái máŋgga beaivái. Ovdal mátkki Britannia media dagahii sudnuide stuorra fuola, namalassii das leago Sámis muohta, muitala Nicola.

Nicola ja Julia leaba boahtán máŋgga beaivái Sápmái.
Nicola ja Julia leaba boahtán máŋgga beaivái Sápmái. Govva: Vesa Toppari / Yle

– Mii leat vuolgán ohcat juovladovddu. Go seaivvuimet de illudeimmet alla jitnii ja doaškkuimet gieđaid oktii go oinniimet, ahte dáppehan lea muohta, govvida sin ilu Nicola.

Man olu áigubeahtti geavahit dáppe ruđa?

– Viehkaláhkai, jáhkán mun, dadjá Nicola ja jearrá oappástis maidbat sii áigotge bargat mátkkis.

– Mii áigut mannat iešguđet reaissuide, dego oaidnit huskyvielpáid ja vuodjit mohtorgielkkáin. Mii áigut oastit dakkár vásáhusaid, maid mii muitit, loahpaha Julia ja doapmala bussii, mii galgá doalvut sin Gárasavvonii.

Varrasamosat: Sápmi

Váldoođđasat

Varrasamosat