Sápmi |

Jurdda bohciidii Niillas Holmberg čájálmasas – riektediehtagiid studeanttat ohppet sápmelaččaid olmmošrivttiin boahtte vahkus Roavvenjárggas

Vahku áigge 70 riektediehtagiid studeantta besset gullat earret eará Anne Nuorgam ja Tiina Sanila-Aikio logaldallamiid.

Tea Selin
Riektediehtagiid studeanta Tea Selin oinnii moadde jagi dassái Arktinen Odysseija -teáhterbihtá ja vásihii, ahte háliida goasnu bargat juoidá sápmelaččaid riektedili ovdii. Govva: Artikla ry

Riektediehtagiid studeanttat čalmmustahttet boahtte vahkus sápmelaččaid olmmošrivttiid davviriikkalaš dáhpáhusas Roavvenjárggas.

Riektediehtagiid studeanttaid searvi Artikla lágida gaskavahkus sotnabeaivái 23.–27.10. Artikla Nordic Week -dáhpáhusa, masa vurdet studeanttaid miehtá Davviriikkaid. Dáhpáhussii oassálastet oktiibuot 70 riektediehtagiid studeantta.

Dáhpáhusa vuoigatvuođalaš temán dán jagi leat sápmelaččaid rievttit davviriikkalaš olmmošriektegažaldahkan.

Temá duohken lea riektediehtagiid studeanta ja Riektediehtagiid studeanttaid searvi Artikla stivrra olgoáššiid vástideaddji ja birasáššiid vástideaddji Tea Selin. Son oinnii moadde jagi dassái Álbmotteáhteris Ruska Ensemble bihtá Arktinen Odysseia ja dat guoskkahii su sakka.

Teáhterbihtás ohcejohkalaš Niillas Holmberg ovdanbuvttii iežas duogáža ja muitalii sápmelaččaid historjjás ja suomaiduhttimis.

– Dat lei hui fámolaš. Mu mielas juohkehaččas galgá leat riekti iežas kultuvrii. Vásihin, ahte mii galggašeimmet Suomas eanet loktet sápmelaččaid riektedili ovdan ja leat maiddái davviriikkalaš dásis diđolabbot EU-guovllu áidna álgoálbmogis.

– Čájálmasa maŋŋá mu mielas orui, ahte háliidan muhtin beaivve dahkat juoidá konkrehtalaččat álgoálbmogiid olmmošrivttiid ollašuvvama ovdii. Sámerivttiid válljen Nordic Week -dáhpáhusa vuoigatvuođalaš temán orui leamen rivttes liiba lasihit diđolašvuođa, muitala Selin.

Prográmmas leat logaldallamat ja feasttat

Nordic Week -dáhpáhusas lea beaivit akademalaš prográmma, masa gullet earret eará logaldallamat ja galledeamit duopmostuoluide. Dasa lassin lea maiddái eahketprográmma, mii sisttisdoallá feasttaid ja eará suohttasiid, ja maiddái Artikla-searvvi 40-jagi ávvudoaluid.

Vahku áigge studeanttaide logaldallaba jurista, sámediggelahttu ja ON álgoálbmogiid bissovaš foruma ságadoalli Anne Nuorgam ja Sámedikki ságadoalli Tiina Sanila-Aikio.

Artikla Nordic Week 2019 -bivttasmearka
Dáhpáhusa várás leat ráhkadahttán studeanttaid obbabivttasmearkka. Dan lea plánen Lotta Tervo. Govva: Artikla ry

Temá áigot čalmmustahttit maiddái earret eará dáidagiin, studeanttaid obbabivttasmearkkain ja nu, ahte ovdamearkka dihtii beivviid álggus dearvvahit sámegillii. Jurdda lea somás ja konkrehta vugiin loktet ovdan dehálaš, muhto muhtinláhkai maiddái váttes gažaldagaid, čilge Selin.

– Sávan, ahte juohkehaš vuolggášii dan vahkus ruoktot seammalágan jurdagiiguin, go mun dalle, go vulgen Álbmotteáhtera Willensaunas Aktinen Odysseija -čájálmasa maŋŋá.

Dáhpáhusa prográmma gávnnat Facebookis.

Varrasamosat: Sápmi

Váldoođđasat

Varrasamosat

Muualla Yle.fi:ssä