Sápmi |

Jussi Halla-aho: "In leat fuopmášan vaššiságaid sámiid vuostá"

Vuođđosuopmelaččaid europarlameanttalahttu Jussi Halla-aho ii leat fuopmášan vaššiságastallamiid sápmelaččaid vuostá. Su mielas Suomas eai leat váššiságat eanetgo earáge Eurohpá riikkain, muhto dál dat leat badjánan sisafárrema oktavuođas. Interneahtta ja sosiálamedia addet vejolašvuođaid dadjat maid beare, maid ii muđuid jitnosit dajašii, lohká Halla-aho.

Jussi Halla-aho
Europarlamentta miellahtu Jussi Halla-aho, vuođđosuopmelaččat. Govva: Anneli Lappalainen / Yle

Europarlameantta miellahttu Jussi Halla-aho (vuođ.) oaidná, ahte vaššisáhka-doaba geavahuvvo menddo olu.

Son ii goitge meroštala, maid vaššisáhka su mielas mearkkaša.

– Mu mielas dat lea hearvás sátni ja dáinna sániin sáhttá jaskkodahttit buot dakkár ságastallamiid, mat eai leat miela mielde.  Mun divttán meroštallat vaššisáhka –sáni sin, geat dán sáni hálidit geavahit.

Suoma vuoigatvuohtaministeriija almmustahttin vaššisáhkaraportta mielde Suomas unnilohkujoavkkut vásihit vaššiságaid.

Oahpahus- ja kulturministeriija leage dál álggahan guđa miljon euro doaibmaprográmma, man ulbmilin lea eastadit vaššiságaid ja rasismma, ja lasihit oasálašvuođa servošis.

"Mun in leat fuopmášan váššiságaid sámiid vuostá"

Halla-aho oaidná, ahte Suomas eai leat váššiságat eanetgo earáge Eurohpá riikkain, muhto dál dat leat badjánan sisafárrema oktavuođas.

Olbmuin lea su mielas áddehahtti fuolla.

– Neahtta ja sosiálalašmedia addet vejolašvuođaid dadjat maid beare, maid ii muđui jitnosit dajašii, lohká Halla-aho.

Su mielas olbmot galggašedje oahpahallat gierdevažžan váivves áššiide, nu ahte ii juohke duššis loavkašuva. Sámiid vuostá son ii leat vuohtán vaššiságaid.

– Mun in leat fuopmášan vaššiságastallamiid sápmelaččaid vuostá. Mun in dieđe gii dán hárjeha ja gos.

"Birget almmá vaššisáni hagage"

Su mielas vaššisáhkan steampalastin hávkada rivttes ságastallama go doahpaga geavaheapmi viidu obba áigge. Dábálaš ságastallange oažžu álkit vaššisáhka-steampala.

– Suomas lea gelbbolaš dušše okta oaidnu sisafárremis ja ovttastahttimis Suoma servvodahkii. Dáppe gal birgešii áibbas bures almmá dán vaššisáhka –sánige.

Halla-aho ii beroš veháge juos su vuostá leat vaššiságat. Son ávžžuha earáidge dahkat nu. Sosiálalašmedias lea maid ollu buorre dán šláma sisti. Su mielas gálgá eanet giddet fuopmášumi interneahta ja sosiálalašmedia fálaldagaide go šlápmii.

– Juos mii eat hálit Kiinná láhkásaš bearráigeahču, de mii fertet dohkkehit maid daid ahkidis ságaid.

Varrasamosat: Sápmi

Váldoođđasat

Varrasamosat

Muualla Yle.fi:ssä