Sápmi |

Jussi Isokoski illudii Áillohaš-bálkkašumis: "Mus ii lean makkárge diehtu olles hommás!"

Jussi Isokoski lea buvttadan sámemusihka logemat jagi Tuupa Records -skearrofitnodagas. Áillohaš-bálkkašumi jury mielas Isokoski lea buvttadan čehpet máŋggabealat sámemusihka sámeartisttaiguin ja ovddidan erenomážit nuorra sámeartisttaid. Isokoski ieš ii máhttán oba vuorditge dákkár bálkkašumi.

Jussi Isokoski
Áillohaš bálkkášupmi geigejuvvui Jussi Isokoskii Sámi Grand Prix -finála oktavuođas. Govva: Liv Inger Somby / NRK Sápmi

Áillohaš-bálkkašupmi 2014 geigejuvvui beassášlávvardaga Jussi Isokoskii.

Jussi Isokoski lea buvttadan sámemusihka logemat jagi Tuupa Records -skearrofitnodagas. Bálkkašumi jury mielas Isokoski lea buvttadan čehpet máŋggabealat sámemusihka sámeartisttaiguin ja ovddidan erenomážit nuorra sámeartisttaid.

Áillohaš-bálkkašupmi lea juhkkojuvvon jagi 1993 rájes ja dat lea geigejuvvon ovdal earret eará Mari Boinei ja Sofia Jannokii.

Bargá ain viidásit sámemusihkain

Jussi Isokoski ieš illudii bálkkašumis iige livčče máhttán dan oba vuorditge.

– Mus ii lean makkárge diehtu olles hommás! Mu dat ožžo deike nie ahte jerre mu ráhkkadit dán jagáš Sámi Grand Prix -skearru ja ikte ledjen barggus jietnabeavddi duohken ja dadje munnje ahte gal mun ferten báhcit deike geahččat loaiddastemiid vai dieđán ahte mo galggan bargat bihttáiguin. Dákkár rávvagiid ožžon, go mun ledjen jo vuolgimen eará bargguide. Na mun de jurddašin ahte mun bázán vel deike geahččat ja dat leige dakkár skealbmahommá, Isokoski boagusta.

Isokoski áigu dál bargat viidásit musihkkaprošeavttaiguin. Iŋgá-Máret Gaup-Juuso ođđa juoiganskearru lea boađi boađi, son lea Tuupa Records -skearrofitnodaga ođđa artista. Jussi Isokoski maid ráhkkada Sámi Grand Prix 2015 -skearru.

Juhke bálkkašumi Sámi Grand Prix -gilvvu oktavuođas

Áillohaš-bálkkašupmi juhkkojuvvui Sámi Grand Prix -gilvvu oktavuođas beassášlávvardaga.

Sámi Grand Prix -gilvvu juoiganoasi vuittii dán jagi kárášjohkalaš Johan Anders Bær luđiin Skomáhkár Ánde, Bær oaččui 64 čuoggá. Nubbin bođii gárasavvonlaš Iŋgá-Máret Gaup-Juuso, 51 čuoggáin ja goalmmadin fas šattai Per-Olof Nutti Ruoŧa beal Gárasavvonis, 39 čuoggáin.

Lávlunoasi vuoitu manai Guovdageidnui, Nils Henrik Buljo vuittii  lávlagiin 1+1, son oaččui 31 čuoggá. Nubbin bođii guovdageaidnolaš ja gárasavvonlaš Háldi 29 čuoggáin. Goalmmadin bođii vuohččulaš Ravggon-joavku 25 čuoggáin.

Varrasamosat: Sápmi

Váldoođđasat

Varrasamosat

Muualla Yle.fi:ssä