Sää´mjânnam |

Kåʹllǩiõll -ciist vuäʒai lie Svonni, Vuolab da Sivertsen

Kåʹllǩiõll -ciist vuäǯǯa täʹvvsääʹmǩiõl uʹčteeʹl da tuʹtǩǩeei Mikael Svonni, ǩeʹrjjneǩ Kerttu Vuolab da sääʹmǩiõl uʹčteeʹl Seija Sivertsen.

Gollegiella 2014: Sivertsen, Vuolab, Svonni
Seija Sivertsen, Kerttu Vuolab da Mikael Svonni. Govva: Vuoigatvuohtaministeriija

Eeʹjj 2014 tâʹvvjânnmlaž sääʹmǩiõl cistt "Kåʹllǩiõll" lij miõttum koumm ooumže. Ciist vuäǯǯa täʹvvsääʹmǩiõl uʹčteeʹl da tuʹtǩǩeei Mikael Svonni, ǩeʹrjjneǩ Kerttu Vuolab da sääʹmǩiõl uʹčteeʹl Seija Sivertsen.

Ärvvtõõllâmkomitea oudd tobdstõõzz Mikael Svonni kuʹǩesäiggaž reâuggmõõžžâst tâʹvvsääʹmǩiõl ouʹdde Ruõčč beäʹlnn. Kerttu Vuolab vuäǯǯ Kåʹllǩiõll-ciist reâuggmõõžžâst tâʹvvsääʹm mooččâdǩeʹrrjlažvuõđ ooudâsviikkjen da Seija Sivertsen jieʹllemtuâjast nuõrttsääʹmǩiõl da nuõrttsaaʹmi kulttuur di nuõrttsääʹmõhttsažkååʹdd ouʹdde tuejjuum tuâjast.

Kåʹllǩiõll -ciist täävtõʹssan lij viikkâd sääʹmǩiõlid ooudâs

Juõʹǩǩ nuuʹbb eeʹjj jueʹǩǩem Kåʹllǩiõll-cistt miõđât privatoummuid leʹbe õhttõõzzid Taarrâst, Ruõccâst, Lääʹddjânnmest leʹbe Ruõššâst sääʹmǩiõl ooudâsviikkâm diõtt. Cistt jueʹjjet ååʹn kuuđad vuâra da tõt lij õhttsa 15 000 euʹrred. Ǩiõllciist täävtõssân lij mieʹttvaikkted sääʹmǩiõl seillmõʹšše da ooudâsviikkmõʹšše.

Ciistvuäʒai valljj komitea, koozz lie võborseeʹǩǩ Taarrest, Ruõccest, Lääddjânnmest da Ruõššjânnmest. Tän eeʹjj komitea saaǥǥtuõʹllʼjeejin leäi emeritus professor Pekka Sammallahti.

Vuõiggâdvuõttminister Anna-Maja Henriksson jueʹjji ciist täʹbbe Heʹlssnest Tâʹvvjânnmi sääʹmääʹššin vaʹstteei ministeerivuiʹm da sääʹmteeǧǧ saaǥǥtuõʹllʹjeejivuiʹm õnnum kaaunõõttmõõzzâst.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä