Sápmi |

Kari Kyrö lea sámediggeválggaid vuoiti – "Lean beroštuvvan ságadoallibáikkis"

Anárlaš Kari Kyrö fidnii válggas 220 jiena.

Sámediggeáirras Kari Kyrö.
Anárlaš Kari Kyrö vuittii válggaid 220 jienain. Govva: Inger-Elle Suoninen / Yle

Suoma sámediggeválggaid nu gohčoduvvon jietnahárát lea anárlaš Kari Kyrö. Son čokkii válggas oktiibuot 220 jiena. Nubbin eanemus jienaid sámediggeválggas fidnii sosionoma ja gárrenávnnasbargi Anu Avaskari (Anár) ja goalmmádin eanemus jurista Anne Nuorgam (Ohcejohka).

Kari Kyrö lea ealáhatolmmoš ja guolásteaddji, ja lea bargan 40 jagi Ohcejoga Geavu álbmotmeahccehoavdan. Kyrö lea Anára guolástanguovllu stivrra ságadoalli ja gullá maiddái Suoma Čuoiganlihtu lihttostivrii, Davvi-Suoma Oktasašvuvddiid stivrii, Inarinmaan lapinkylä -searvvi stivrii ja Anárjávrri čuovvunjovkui. Dasa lassin son lea Inarin Yritys -valáštallansearvvi ekonomiijadikšu ja stivrralahttu. Su eatnigiella lea suomagiella.

Kyrö ii lean vuordán stuorámus jietnasállaša.

– In duođaige jáhkkán dan, giittán buot jienasteaddjiid luohttámušas. Lean eambo go duhtavaš, illuda Kyrö.

Stuorra jietnameari geažil son lea beroštuvvan ságajođiheaddjibáikkis.

– Lean beroštuvvan maiddái ságajođiheaddjibáikkis, sávvamis dat manná bures. Sávan min oažžut ságadoalli, gii bastá hukset buori ovttasbargovuoiŋŋa ja oažžu buriid bohtosiid áigái buot sápmelaččaid dáfus.

"Válgalávdegoddi ii lihkostuvvan barggustis"

Alimus hálddahusriekti dohkkehii Kari Kyrö Sámedikki válgalogahallamii jagis 2011. Son válljejuvvui vuosttas háve Sámediggái mannan válggain čakčat 2015. Maiddái dalle son čokkii goalmmádin stuorámus jietnasállaša, 189 jiena. Kyrö lea doaibman Sámedikkis válgabaji 2016–2019 lahttun.

Sámedikki válgalávdegoddi gahčahii geassit válgalogahallamis eret 94 olbmo, geaid Suoma alimus hálddahusriekti lei dohkkehan jienastuslohkui. Kyrö lei okta sis. AHR goittotge celkkii, ahte válgalávdegoddi ii sáhte mannat iešnjulgemiin duopmostuolu mearrádusa meattá.

– Dálhan ledje máŋggalágan mohkit dán válggain. Dat čájáhus, mii dáid válggaid áigge lea leamaš, in hálit dakkára šat vásihit. Válgalávdegoddi ii lihkostuvvan dáid válggain obage.

"Sávan min bastit gaskaneamet soabadallat"

Válgavuoiti lohpidii Yle Sámi válgamášenis ovddidit sápmelaččaid oktilašvuođa, buot sápmelaččaid dásseveardásašvuođa, ja guovllu olbmuid eallima ja lágalaš ealáhusaid oktiiheiveheami.

Sus leat ain seamma áigumušat.

– Mii leat álo bastán gaskaneamet soabadallat ja sávašin, ahte boahttevuođas mii ieža čielggadivččiimmet daid áššiid, mat dagahit riidduid, ja bastášeimmet soabadallat gaskaneamet.

Sámediggeválgga buot bohtosiid sáhttá geahččat Yle Sámi válgaboađusbálvalusas.

Varrasamosat: Sápmi

Váldoođđasat

Varrasamosat

Muualla Yle.fi:ssä