Sápmi |

Kaustinen álbmotmusihkkafestiválas čuodjá sámemusihkka bearjadaga ja lávvordaga

Hildá Länsmana ja Viivi Maria Saarenkylä duo Vildá loaiddasta Kaustinen álbmotmusihkkafestiválas.

Ijahis Idja 2018
Govva: Vesa Toppari / Yle

Kaustinen álbmotmusihkkafestivála lea álgán mánnodaga. Festiválas lea beassan ja beassá gullat iešguđetlágan musihkka. Dán vahkkoloahpa festiválas lea vejolaš gullat maiddái sámemusihka, go duo Vildá loaiddasta doppe. Vildá joavkkus čuojaheaba Viivi Maria Saarenkylä ja Hildá Länsman. Dán vahkus Länsmana lea sáhttán gullat loaiddasteame maiddái Riddu Riđđu -festiválas.

Dát ii leat Länsmanii vuosttaš geardi go son lea loaiddasteame Kaustinen álbmotmusihkka festiválas. Son muitala Kaustinen álbmotmusihkkafestivála leat hui fiinna festivála man son lea beassan jo oktii ovdal vásihit.

– Moadde jagi dassái Gájanas-joavkkuin ja dat lei somás vásáhus beassat leahkit doppe ja hui somá ahte beassá vuot ođđasit, lohká Länsman.

Jagis 2017 Gájánas-joavku válljejuvvui Kaustinen álbmotmusihkkafestivála Jagi musihkkajoavkun.

Festiválas musihkka gullo juohke nurkki duohken

Länsman muitala, ahte festiválas leat olu artisttat ja musihkka gullo juohke nurkki duohken ja dan nanne maiddái Festivála doaimmajođiheaddji Silja Heikkilä, son maid lohká, ahte buot gálledeaddjit čáhket bures Kaustinenii.

– Bures mii deike čáhkat. Sáhttá dadjat ahte dáppe ii gávdno jaskkes sadji, dáppe festiválaguovllus dáhpáhuvvá oba áigge. Mis leat 30 iešguđetlágan lávddi ja measta oba áigge, birra diimmu čuodjá gosnu, Heikkilä muitala.

Heikkilä muitala ahte Kaustinis ledje diibmá gálledan oktiibuot 47 000 geardde ja, ahte festiválas leat 4000 musihkkára (su. pelimanni) máŋgga iešguđet riikkas.

Duo Vildá sáhttá oaidnit loaiddasteame Kaustinen álbmotmusihkkafestiválas sihke bearjadaga ja lávvordaga. Festivála olles prográmma oainnát dáppe.

Yle Johtti Radio -sátta sáddejuvvui duorastaga 11.7.2019 Kaustinenis. Hildá Länsman ja Silja Heikkilä jearahallamiid sáhttát guldalit Yle Areenas.

Johtti Radio 11.7.2019 Jietna: Yle Areena

Dán vahkus leat jođus festiválat maiddái sámeguovllus. Lakselvis, Norggas lea jođus Midnattsrocken, ja Olmmaivákkis, Norggas ordnejuvvo Riddu Riđđu. Eanet dieđu dán geasi festiválain gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä