Sápmi |

KEiiNO njealját, "suollemas" lahttu lea dovddus suopmelaš musihkkabuvttadeaddji – joavkkus jo ođđa musihkka vuordimin almmustahttima

KEiiNO-joavku beasai duorastateahket Eurovision-lávlungilvvu finálii, mii ordnejuvvo lávvardaga Tel Avivis Israelis.

KEiiNO
Norgga delegašuvdna semifinálas. Henrik Tala goalmmádin gurut bealde. Govva: Thomas Hanses

Duorastateahket olles Sápmi doalahii heakkas, go Norgga ovddasteaddji KEiiNO gilvalii Eurovision Song Contest -finálabáikkis Tel Avivis Israelis.

KEiiNOs leat mielde guovdageaidnolaš musihkkár Fred René Buljo ja lávlut Tom Hugo ja Alexandra Rotan. KEiiNO beasai finálii sápmelaš-norgalaš-suopmelaš ovttasbargguin ráhkaduvvon Spirit in the Sky -bihtáin.

Joavkku njealját, "suollemas" lahttu lea suopmelaš musihkkabuvttadeaddji Henrik Tala, guhte lea buvttadan bihtáid stuorra skearrofitnodat Warner Music ja Sony Music artisttaide. Son lea ovttasbargan earret eará Arttu Wiskariin.

Ovttasbargu KEiiNOin álggii mannan geasi loahpas, nu gohčoduvvon musihkkaleairras Norggas. Doppe son oahpásmuvai Tom Hugoi, ja das dat de álggii.

– Lei stuorra gudni, go Tom bivddii mu buvttadeaddjin sidjiide. Su sáhttá gohčodit dán joavkku guovddášolmmožin, su bokte leaba maid Fred ja Alexandra boahtán dasa mielde. Son lea čohkken olles dán min joavkku, muitala Tala.

Ráppejeaddji šattai juoigin

Leairra maŋŋá Henrik Tala johtigođii dávjá Norggas ja čavčča mielde Spirit in the Sky -bihttá hápmašuvai gárvvisin. Tala váldoovddasvástádus lei buvttadeapmi, muhto son oassálasttii maid bihtá šuoŋa ráhkadeapmái.

– Iešalddes mun bargen olu Frediin, go son bijai luođi dán bihttái. Sus ledje máŋga sierra veršuvnna, ja moai ovttas smiehtadeimme, mii heivešii buoremusat, čilge Tala bihtá ráhkadeamis.

Fred Buljo
Fred Buljo ii leat guhká juoigan almmolaččat. Govva: Andres Putting

Spirit in the Sky -bihtáin KEiiNO háliida čalmmustahttit dan, ahte juohkehaš galgá dohkkehuvvot dásseárvosažžan, dakkárin go lea.

– De fuobmáimet, ahte dat heivešii Eurovision-gilvui, go gilvvus buktojuvvojit iešguđetlágan kultuvrrat oktii ja riikkat hárjehallet positiivvalaš politihka gaskaneaset. Jurddašeimmet, ahte dán bihtás lea juoidá, maid muitalit das, čilge Tala.

Fred René Buljo lea šaddan Sámis dovddusin Duolva duottar -musihkkajoavkku ráppejeaddjin. Son bargá sámi mánáidgárddis Oslos, gos son lea mánáiguin oahpahallan juoigat.

– Mun in leat juoigán nu guhká. Dát lea dušše mu viđát mánnu, ahte mun almmolaččat juoiggan, muitala Buljo.

Boahttevuođas háliida eambo ovttasbargat sámemusihkkáriiguin

Ovttasbargu KEiiNOin doalvvui musihkkabuvttadeaddji Henrik Tala vuosttas geardde Eurovišuvdnii. Vásáhus lea leamašan sutnje dan mađe erenomáš, ahte son jáhkká iežas sihkkarit joatkit eurovišuvdnalávlagiid ráhkadeami.

Son áinnas áiggošii ovttasbargat sámemusihkkáriiguin maid boahttevuođas.

– Dáppe báikki alde lea nu fiinnis, go oaidná máŋggalágan kultuvrraid iešguđet riikkain musihka bokte. Lean nu ilus, go beasan ovddastit dáppe. Vaikko in ovddas iežan riikka, de ovddastan goittotge (sáme)kultuvrra, mii lea nanus maid Suomas.

Tala muitala, ahte lea Tel Avivis juo háleštan eará musihkkáriiguin musihkkaleairra ordnemis vai besset ráhkadit lávlagiid maiddái boahtte jahkái.

KEiiNO ii heaitte Eurovišuvnnaide – ođđa bihtát vuordimin almmustahttima

Bohtos makkár boađus fal Eurovišuvnnaid finálas, KEiiNOs leat juo čielga plánat boahttevuhtii. KEiiNOs leat moadde ođđa bihtá juo gárvvisin vuordimin almmustahttima, muitala joavkku buvttadeaddji Henrik Tala.

– Ja boahttevuođas ráhkadit ain eambo musihka. Dasa lassin leat plánen, ahte KEiiNO jođášii miehtá máilmmi boahtte jagi ja sáhtášii ovttasbargat ovdamearkka dihte Ođđa-Selándda eamiálbmot-maoriiguin.

Eurovišuvnnaid finála sáddejuvvo Yle TV2:žis lávvardaga diibmu 22 ovddosguvlui.

KEiiNO-joavkku juoigi Fred René Buljo muitala, ahte juo oassefinálas sus lei buorre miella.

Mun dovden, ahte go mii manaimet lávddi alde vulos, ahte mii leat dahkan buori barggu, ja mun gal measta árvidin, ahte mii mannat viidásabbot. Gal jáhkán ihttin mii dahkat vel buoret barggu, dadjá Buljo.

Guldal Henrik Tala olles jearahallama ja eambo Eurovision-ságaid njuolga Tel Avivis duorastaga Sohkaršohkas. Fred René Buljo jearahallama oassegilvvu maŋŋá bearjadatiđidis gulat Buorre iđit Sápmi -sáddagis.

Varrasamosat: Sápmi

Váldoođđasat

Varrasamosat

Muualla Yle.fi:ssä