Säämi |

Kela škovlâmätkitoorjâ lii muttum: Oppâkenigâsvuotâ meerid tääl maht torjuid uážžu

Oppâkenigâsvuođâ kukkom vaaigut sehe uápputorjui et škovlâmätkitorjui. Škovlâmätkitorjust láá sierâ iävtuh uáppeid, kiäin lii vuoigâdvuotâ mávsuttes škovliittâsân, já eres uáppeid.

Kela Itäkeskus.3.2.2021.
Kela sijđon puáhtá uáiniđ tiävá-uv iävtuh tieđâ torjuin. Govva: Jorge Gonzalez / Yle

Škovlâmätkitoorjâ lii muttum porgemáánu vuossâmuu peeivi oppâkenigâsvuođâ kukkom keežild.

Uáppest lii vuoigâdvuotâ torjui, jis jotá škovlâmääđhi ucemustáá 10 peivid kalendermánuppaajeest. Toorjâ lii olesmiärálâš, jis mätkipeeivih láá kalendermánuppaje ääigi 15 tâi eenâb. Jis mätkipeeivih láá 10–14, torjuu meeri lii peeli olesmiärálii torjust, čiälgá AIL sijđost.

Mätkipeeivij meeri lii siämmáš uáppeid, kiäin lii já ij lah vuoigâdvuotâ mávsuttes škovliittâsân, pic iävtuh toorjân láá ereslágán. Ovdeláá torjui iävtuh láá lamaš siämmáálágán puohâid uáppeid.

Škovlâmätkitorjuu uáppei, kiäst lii vuoigâdvuotâ mávsuttes škovliittâsân

Tain uáppein, kiäin lii vuoigâdvuotâ mávsuttes škovliittâsân, ucemus škovlâmätki lii čiččâm kilomeetterid.

Torjuu puáhtá finniđ, jis jotá almolij fiävruiguin. Uáppee ij táválávt taarbâš jieš mäksiđ mätkiliipu, pic Kela máksá škovlâmätkitorjuu liipu vyebdei, škovlâjođettem uárnejeijen teikkâ uáppei olssis.

Jis kuittâg ij lah almolâš fiävru, te torjuu finnee meiddei, jis kiävttá jieijâs auto teikkâ eres jieš uárnejum jotteemvuovijd. Torjuu miärán vaaigut tot, mon kuhes mätki lii. Tuárju finnii 10–100 kilomeetter oovtâsundásâš määđhist.

Škovlâmätkitorjuu uáppei, kiäst ij lah vuoigâdvuotâ mávsuttes škovliittâsân

Vâi uáppeeh, kiäin iä lah vuoigâdvuođah mávsuttes škovliittâsân, finnejeh olesmiärálii škovlâmätkitorjuu nuuvt, ete mätkipeeivij meeri lii tuárvi já määđhih mäksih paijeel 54 eurod mánupaajeest. Jieš uáppee ferttee táválávt mäksiđ 43 eurod mánuppaajeest.

Pele olesmiärálii torjust finnee jis määđhih mäksih paijeel 27 eurod mánuppaajeest já jieš máávsáh 21,50 eurod mánuppaajeest.

Škovlâmätkitorjuu finnee, jis kiävttá Walt-jotoluv, škovlâsáátu tâi jieš uárnejum jotteemvyevi. Toorjâ finnee, veikâ tuu määđhih mávsáččii ucceeb.

Kela sämikielâlâš palvâlusäššitobdee Inari Alanko maainâst, ete škovlâmätkitorjuu pyehtih uuccâđ meiddei ovdâmerkkân Säämi máttááttâskuávdáá puárrásub uáppeeh. Sun meiddei maainâst, ete elamassa.fi-siijđost puáhtá tutkâđ, magaráid torjuid tust láá vuoigâdvuođah, jis algâttah sämmilii kulttuur já kielâ uápuid Säämi máttááttâskuávdáást.

Kela sijđoin lii rekinistemmaašin moin puáhtá rekinistiđ, mon ennuv tun puávtáh finniđ toorjâ ovdâmerkkân škovlâmääđhist teikkâ uápuin.

– Ääših láá ain nuuvt jiešlágán eres ulmuin, ain lii pyeri suáittiđ Kelan. Pyehteen oovtâst keččâđ juáhháá jieijâd tile, Alanko muštoot.

Jietna: Sáárákáisá Seurujärvi / Yle

Varrasamosat: Säämi

Váldoođđasat

Varrasamosat

Muualla Yle.fi:ssä