Sápmi |

Kesikyessi Rauni Mannermaa muštâl suu pärnivuođâst suollust: "Must lâi tobbeen pyeremus äigi elimist"

Rauni Mannermaa lii aassâm Kamessuollust nuorâvuođâst. Yle Säämi Kesikyessi-ohjelmist sun muštâl, maggaar lâi eellim suollust, kost iä aassâm iärráseh ko suu peerâ já päikkielleeh.

Rauni Mannermaa Veskoniemen satamassa, taustalla näkyy järveä.
Rauni Mannermaa lii aassâm Veskonjaargâst, já sun aaibâš toho ko tääl áásá Avelist. Govva: Sáárákáisá Seurujärvi / Yle

Oovtâ kiiđâ ko Rauni Mannermaa já suu irgerokke Vilho Mannermaa láin kárbáin jäävri alne, te suoi iävä pieijâm kárbá joton. Suoi halijdáin kuldâliđ kiiđâ. Talle sunnuid uápis professorpeerâ poođij koijâjiđ, ete lii-uv käärbis cuovkkanâm, ko moottor ij lah čääsist.

– Ko Vilho västidij, ete sun ij haalijd pieijâđ tom čáácán, ko uážžu navdâšiđ tast, ko ij kulloo mihheen moottorjienâ. Talle tot professor hiämáskij, já iäge moonnâm motoráin kuussân, ovdil ko jieŋah vuolgii olmânáál, Mannermaa povvust.

Luándujienâi kuldâlem lii ohtâ Mannermaa mielâmield puđaldâsâin. Sun ij kuldâl radio olgon. Jis sun tom haalijd kuldâliđ, te sun mana siisâ. Mihheen ij lah nuuvt tergâd, ete radio taarbâsiččij olgon leđe alne.

Pääihi šiljo lâi tego orroomviste

Rauni Mannermaa lii aassâm pärnin Aanaarjäävri nuorttiibeln Kamessuollust. Maŋeláá sun lii aassâm Veskonjaargâst, já tääl sun lii aassâm Avelist jo kulmâ ive.

Kamessuollust lâi tuše Mannermaa perruu táálu já suu perrust lijjii ohtsis čiččâm ulmuu. Veikkâ suollust iä eres ulmuuh lamaš, te ij šoddâm ohtuunis tobdo, ko perrust lijjii ennuv päikkielleeh já päikkipargoh.

– Maid mun muštám, te must lâi tobbeen pyeremus äigi elimist. Viiljah já uábih lijjii tobbeen, kuusah, saavzah já käneh-uv motomin, muštâl Mannermaa

Pääihi šiljo lâi tego orroomviste. Meecist puovtij kaččâđ já njuškođ. Veikkâ sijdâin láá sierâdemsajeh, te meecist puáhtá sierâdiđ eresnáál já uáiniđ eres aašijd tego mááđuid já piäivááluudijd.

Pärnin sun lijkkui valâštâllâđ já távjá vaazij kieđâin. Ohtâ utke lâi, ete sun finnii tullâsäägi enâmist njaalmijn nuuvt, ete kieđah iä kuoskâm eennâm.

– Ko muu puárrásumos kandâ eelij majemustáá mij kulen, te koijâdij, ete vala-uv mun peesâm nuuvt. Jiem peesâ innig, Mannermaa povvust.

Rauni Mannermaa muštal suu pärnivuođâst suollust Yle Säämi Kesikyessi-rááiđust.

Rauni Mannermaa lii aassâm Kamessuollust nuorâvuođâst. Sun muštâl, maggaar lâi eellim suollust, kost iä aassâm iärráseh ko suu peerâ já päikkielleeh. Jietna: Sáárákáisá Seurujärvi / Yle

Yle Säämi Kesikyessi-rááiđu puáhtá kuldâliđ radiost jyehi vuossargâ já vástuppeivi kesimáánu loopâst porgemáánu pelimudon já meiddei Yle Areenast.

Varrasamosat: Sápmi

Váldoođđasat

Varrasamosat

Muualla Yle.fi:ssä