Sápmi |

Kiasma-musea cuiggoduvvo fakegáktevideo oastimis

Sámedáiddarguovttos cuiggodeaba Kiasma-musea Helssegis fakegáktevideo oastimis. Kiasma čoakkáldagaid intendeantta mielas Grind-nammasaš dáiddafilbma ii goittotge gieđahala sápmelašvuođa.

Govva Jenni Hiltunen dáiddaduojis Grind.
Kuva Jenni Hiltusen videoteoksesta Grind. Govva: Jenni Hiltunen / Vimeo

Sámi govvadáiddárguovttos Marja Helander ja Outi Pieski cuiggodeaba Helsingin Sanomat -aviissas garrasit dáládáidága musea Kiasma, go dan čoakkaldatčájáhusa dáiddafilmmas nissonat jorahit bađaid ja dánsot dievdduid fakegávttiiguin.

Gažaldat lea Jenni Hiltunen videodáiddafilmmas Grind, man Kiasma osttii iežas čoakkáldagaide jagis 2012. Grind lea gárvvásmuvvan jagis 2011 ja dat lea njeallje minuhta guhkki.

Filbma badjánii ságastallamii dál, daningo dat lei dán giđa nuppe háve mielde čoakkáldatčájáhusas ja dan govva almmustahttojuvvui Helsingin Sanomat -aviissas moadde vahku dassái.

"Kiasma lea symbolalaččat sivdnidan álgoálbmogiid kultuvrralaš ávkkástallama"

Sámi govvadáiddárguovttos Marja Helander ja Outi Pieski eaba sáhte ipmirdit, ahte Kiasma lea oastán dáiddafilmma iežas čoakkáldagaide.

– Go Kiasma lea oastán filmma, de dat lea oassin Álbmotgalleriija munno mielas symbolalaččat sivdnidan álgoálbmogiid kultuvrralaš ávkkástallama, Helander guovttos Pieskiin čálliba oaivilčállosis Sámegávtti ávkkástallan lea loavkašahtti – Kiasma ii oro berošteamen das.

Sámedáiddarguoktá mielas orru, ahte fakegákti lea mielde videos dušše eksotihka dihte.

Sudno mielas kultuvrra suoládeapmi joatká Suoma stáhta politihka, mainna dat leat geahnohuhtán sámiid sajádaga, go ii leat ovdamearkan ratifiseren ILO 169 -soahpamuša.

– Dohko beare geahččat, mii lea Suoma álgoálbmoga sajádat jagis 2016, Helander guovttos Pieskiin loahpaheaba.

"Filbma ii gieđahala sápmelaččaid"

Kiasma čoakkaldagaid intendeanta Arja Miller mielas filbma lea boasttut ipmirduvvon iige das leat sáhka sápmelaččain, báicce musihkkavideokultuvrras ja jamaikalaš dánssas.

Arja Miller
Arja Miller Govva: Kansallisgalleria / Finnish National Gallery Aku Häyrynen
Son čilge ahte dáiddara vuohki geavahit sámeelemeanttaid videos buvttii video fáttá lagabui min.

Arja Miller šálloša ja deattuha, ahte Kiasma ii hálit soardit sápmelaččaid muhto báicce bealuštit sin.

– Mus lea hui heajos miella, go jurddašuvvo, ahte dát Jenni Hiltunen dáiddaduodji monu laktašivčče muhtin Kiasma jurdagiidda sápmelaččaid sajádaga birra. Dieđusge mii hálidit bealuštit sápmelaččaid sajádaga ja leat dan oaivilis, ahte buot originálkultuvrraiguin galggašii meannudit olu buorebut. Muhto dát dáiddaduodji ii gieđahala min mielas sápmelašvuođa. Das leat eará ánssut, maid dihtii mii leat hálidan oastit dan min čoakkáldagaide, Miller dadjá.

Kiasma áigu vástidit Helander guovttos Pieski čállosii Helsingin Sanomat -aviisii.

Arja Miller olles jearahallama sáhttá guldalit maŋŋebárgga iđitsáddagis (álgá áiggis 36:57).

Neeta Jääskö 2012: Valkoisuus taiteessa (Vilgesvuohta dáidagis)

Kiasma-blogi: JENNI HILTUSEN GRIND – TEOKSESTA

Petra Laiti: Meanwhile in Finland  

Varrasamosat: Sápmi

Váldoođđasat

Varrasamosat

Muualla Yle.fi:ssä