Säämi |

Kielâ oppâm sundástempäälgis valmâštuumin Anarân – juurdân lihâdiđ já siämmást oppâđ kielâ

Päälgis puátá Anarân valaštâllâmkiedi frisbeegolf-rađe ohtâvuotân.

Video: Marja Liisa Olthuis

Anarâškielâ servi oovdâst Inarin Yritys -valaštâllâmservijn lii vuáváámin pálgá, mast láá lovmat orostâmpäikkid, kost kalga porgâđ mottoom pargopitá. Juurdâ taas poođij ko Anarâškielâ seervi saavâjođetteijee, kielâiäláskittee, Marja-Liisa Olthuis já máttáátteijjee Mervi Sistonen já Inarin Yritys -valâštâllâmseervist Kari Kyrö já tipšoo Pirjo Valikainen aalgij smiettâđ, et maht ulmuid uážuččij lihâdiđ eenâb.

– Ulmuid kalga finniđ stoovlist meddâl já eidu luándun oppâđ, iätá Olthuis.

Sundástempäälgis uáivildum puohháid

Päälgis lii uáivildum nuuvt vuorâsulmuid ko škovlâlijd. Raađeest kávnojeh nuuvt vaigâdub ko hiälpubeh-uv pargopitáh. Ravvuuh čergâstuvvojeh frisbeegolf-rađe orostempaihijd. Tobbeen kávnoo ovdâmerkkân taggaar pargo, et uusâ kuttâ eres muorâšlaajâ, teikkâ iirât väldiđ kuuđhâst kove.

– Ravvuid kalga laministiđ já pieijâđ nuuvt, et taid kávná, muštâl Olthuis.

Minna Lampinen ja Marja Liisa Olthuis
Marja Liisa Olthuis já Minna Lampinen suunâttâllâv sundástempálgá Anarist. Govva: Anja Kaarret / Yle

Lihâdem-oppâmpäälgis kávnoo Anarist, Inarin Yritys stadion paaldâst vuálgá miäccán frisbeegolf rađe, te tom ohtâvuotân lii rahtum taat oppâpáálugis.

Päälgis ij lah kukke, mut äigi mana pargopittáid

Rađe kukkodâh lii tuše muáddi kilomeetter, mut ko parga ravvui mield kielâpargoid, te toos kannat väridiđ äigi. Kávnoo hiälpub já vigâdub muulsâiähtu. Aanaar škoovlâ máttááttejjee Minna Lampinen vuárdá-uv et piäsá uáppeiguin jotteeđ taan pálgá. Tääl sist lii-uv hiälppu vyelgiđ luándun, ko sii láá tääl varrim oovtâ pááikán alda luándu, olmâ škovlâ sisteáimu vädisvuođâi tet.

– Mij lep jyehi peeivi olgon já irâttep peessâđ luándun nuuvt ennuv ko máđhulâš já taat lii pyeri, ko päälgis puátá alda mii škovlâtáálu, illood Lampinen.

Kuldâl Marja Liisa Olthuis já Minna Lampisen sahhiittâllâm täst.

Varrasamosat: Säämi

Váldoođđasat

Varrasamosat

Muualla Yle.fi:ssä