Säämi |

Kiergâneh-uv Tave-Aanaar kuálásteijeeh finniđ jieŋâid taan keesi? – jieŋâkuávdáá huksim ááiján vaidâlus tiet

Tave-Anarist Kuátiluohtân uáivildum jieŋâkuávdáá huksim ij val lah peessâm joton. Rähtim ááiján vaidâlusâi keežild.

Jietna: Kuálásteijee Pekka Kokkonen.
Jietna
Päärttihlâš kuálásteijee Pekka Kokkonen.

Tave-Aanaar kuálásteijeid uáivildum jieŋâkuávdáá huksim maŋŋaan.

Aanaar kundá lâi huksiimin jieŋâruustig Čevetjäävri luoddâpiällás, Kuátiluohtân, nyevt muáddi kilomeetter luodâst tuárispel Aanaarjäävri riidon. Tobbeen kuálásteijee uážuččii kuolij várás čuáskudeijee jieŋâid.

Pääihi huksimpargoh algii jo kesimáánu aalgâst, ko kundástivrâ meridij algâttiđ pargoid. Tohon rahtii kááivu-uv vaalmâšin, siämmást ko káivurähtee eelij Avveel Viäskonjaargân rähtimin meid uđđâ kááivu.

Kuátiluohtâ ij tuhhii puohháid

Päärtihliih vaidâlii tast, ete jieŋâkuávdáš puáđáččij Kuátiluohtân.

Jieŋâkuávdáš lii uáivildum kávpálijd kuálásteijeid. Pärttihist láá muáddi kávpálâš kuálásteijee, Kuátiluovtâ kuávlust ij ohtâgin. Päärtihliih lijjii tuáivuđ jieŋâkuávdáá aldeláá Päärtih.

Vuossaargâ Aanaar kieldâstivrâ meridij, et Kuátiluovtâ jieŋâsiäiluttemsaje huksim vyerdih tassaaš, ko Tave-Suomâ Haldâttâhriehti lii meridâm, maht tot ovdán vaidâlusâin.

Päärtihlâš kuálásteijee Pekka Kokkonen ij osko, et uážžu val taan keesi jieŋâid alda, mut tondiet kannattij vaidâliđ. Sun ij lah peessâm taan keesi ennuv kuálástiđ, ko jieŋâi viežžâmmätki lii kukke. Taat lâi jo nubbe keesi, ko päärtihliih láá karttâm leđe jieŋâittáá.

– Tuáivumist taas uážžuh taggaar čuávdus, mii palvâl páihálijd já Tave-Aanaar kuálásteijeid. Kuátiluohtâ ij lah tot šiev päikki, iätá Kokkonen.

Puoh vaalmâšin, lope tuše váilu

Aanaar kundá lii kuittâg jo tiilám rustigijd jieŋâi ráhtim já -siäiluttemsaje várás.

Rustigijd áiguh fievridiđ Kuátiluohtân já väldiđ anon tom maŋa, ko ääši láá kietâdâllâm haldâttâhrievtist já jis haldâttâhriehti ij kieldi ääši jotonpieijâm.

Jari Huotari
Aanaar kundáhaldâttâs saavâjođetteijee Jari Huotari. Govva: Ritva Torikka / Yle

Aanaar kundáhaldâttâs saavâjođetteijee Jari Huotari ij osko, et taan keesi innig peessih pieijâđ joton jieŋâruustig. Jieš jieŋâruustig fievrideh porgemáánu äigin Kuátiluohtân, vyerdiđ kuás puátá lope pieijâđ tom joton. Huotari osko, ete jis iä lijjii vaidâliđ, te jieŋâmaašin lijjii uážžuđ kiävtun taan keesi.

– Mun lam jo alga rääjist irâttâm miäruštâllâđ, et jos vistig piejâččii tom Kuátiluohtân, ton lii talle älkkee sirdeđ pääihist nuubán. Kuátiluovtâst lii jo šleđgâsátku já káivu valmâšijn, muštâl Huotari.

Varrasamosat: Säämi

Váldoođđasat

Varrasamosat