Sää´mjânnam |

Ǩieʹsskueʹss Heini Wesslin ciʹsttai luâđ da nåårr tåʹlǩ tõn, mâid taarbaš: “Luâđast ij kaʹnnet väʹldded, mâid ij taarbâž”

Ǥu njââʹlläiʹǧǧ älgg, čeʹvetjäuʹrrneǩ Heini Wesslin älgg noorrâd. Son nåårr pâi, mâid taarbaš da âânn.

Video: Heini Wesslin näyttää, miten parkkia kerätään.
Heini Wesslin čuäʹjti, mäʹhtt ååst noorât. Video: Janica Gauriloff / Yle

Ǩieʹssmannust åstt älgg leeʹd vaalmâš da čeʹvetjäuʹrrneǩ Heini Wesslin nåårr tõn da jeeʹres šââddaid ouddmiârkkân kueʹllčuõm åstteem vääras da čee vääras.

Ǥu olžvueiʹvv älgg lieʹđđeed, teâtt, što lij njââʹlläiʹǧǧ. Teʹl Wesslin älgg noorrâd ååst da jeeʹres šââddai lõõstid. Håʹt mâka lueʹmlõõstid son käunn âʹlddjieʹǧǧest. Wesslin tueʹjjad čeeid jeeʹres šââddain da lõõstin.

– Luâđast ij kaʹnnet väʹldded, mâid ij taarbâž, Wesslin tuâtt.

Loppǩieʹzz uuzzât muõʹrjid da noorât kuõbbrid. Muõʹrjid da vueʹzz kuõbbrin Wesslin påårr da vueʹzzest son päinn lääiʹjid.

– Tõt lij muu čohččtuâjj, teʹl pääinam lääiʹjid. Juõʹǩǩ čõõuč haaʹlääm päinnad, Wesslin särnn.

Lääiʹjin Wesslin kååđđ sookkaid, koolpiǩ-keäʹpprid da tikkrid. Taarb mieʹldd son kååđđ vuõddjid še.

Påʹrǧǧmannust lij šiõǥǥ noorrâd kaammisuõiʹnid.

Wesslin âânn noorrmõõžž tääʹrǩes vueʹssen äʹrbbvuõʹjjin da haaʹlad juäʹtǩǩed ooudâs tän silttõõzz. Son haaʹlad smeʹllkâʹtted jeeʹres oummuid še noorrâd šââddaid.

– Mon kâl haaʹleʹčem särnnad juõʹǩǩkiʹžže, što kaʹnnat kåiʹtted noorrâd luâđast aunnsid, Wesslin maainast.

Heini Wesslin maainast Yle Sääʹm ǩieʹsskueʹss-prograammâst suu noorrâmstaarjõõzzâst.

Täʹst vuäitak kuvddled, mâid Wesslin särnn. Jietna: Janica Gauriloff / Yle

Yle Sääʹmm vuõlttad ǩieʹsskueʹss-prograamm vuõssaarǥ da piâtnâc čõõđ ǩieʹzz. Prograamm vuäitak kuvddled Yle Areenast še.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä