Sää´mjânnam

Ǩieʹsskueʹss: Muumstääll Teemu Titola auʹǯǯai puõlvvõõǥǥid säämsted – nuõrttsääʹmǩiõllsaž päärnaiprograammâst lij šuurab vaikktõs, koon veâl tieʹttep

Teemu Titola kesällä 2021.
Vuõssaarǥ Ǩieʹsskueʹss Teemu Titola mättʼtõõli siõmmnai päärnžen nuõrttsääʹmǩiõl, leâša vuõrâsooumžen feʹrttji ǩiõl väʹldded oʹđđest jeällma. Govva: Sara Wesslin / Yle

Âʹvvelneǩ Teemu Titola mättʼtõõli oʹđđest sooǥǥâs ǩiõl da tät ǩiõllpääʹljes viiǥǥi suu mieʹldd Muumstääl rooʹle. Juʹn uuʹccab ǩiõlltuâjast vuäitt leeʹd jõnn vaikktõs kulttuuʹre da sääʹmǩiõʹlle, vuäinn Titola.

Teimma âʹvvelneǩ Teemu Titola vuäǯǯai sååit, mâʹst šõõddi suʹnne õhtt jieʹllmes jõnn aaʹššin. Nuõrttsääʹmǩiõllsaž Muumlieʹǩǩ-päärnaiprograʹmme leʹjje õinn ooccmen åummai jiõnid. Nuʹtt še Titola koččuš mieʹldd casting-šõddmõʹšše.

Ij mõõnnâm määŋg määnpââʹj, ko Teemu Titola õõutsââʹjest jeeʹres nuõrttsääʹmǩiõllsaž muumivuiʹm leäi Heʹlssnest liântteʹmmen päärnaid sääʹmǩiõllsaž prograamm.

Suu roolân leäi leeʹd Muumstääll.

– Muumstääll leäi nåkkam muunallšem rool. Muumstääll iʹlla teänab nuʹtt uʹcc, nuʹtt leäi hiâlpp muʹnne leeʹd tõn roolâst, mušttal Titola.

Ko jiõčč programm puõʹđi vuõssvuâra tv:st, tõn miârktõõzz ij vuäittam obbnes veâl tieʹtted, vuäinn Teemu Titola.

– Kâʹl tõt lij nuʹtt vääžnai obb kulttuuʹre. Ouddâl tän iʹlla tuejjuum nåkkam päärnaiprogramm koolm sääʹmǩiõʹlle. Leäm õinn siõmmna sääʹntem tõn miârktõõzzâst kulttuuʹre. Vueiʹttep vueiʹnned tõn muäʹdd eeʹjj ǩeeʹjjest, mâid tõt lij tuejjääm, vuäinn Titola.

Muumilaakson koltansaamenkielisen Muumipeikon äänen antaa Teemu Titola. Kuvassa ohjaaja Susa Saukko.
Muumlieʹǩǩ oʹhjjeei Susa Saukko da Muumstääll Teemu Titola ǩeässa 2020 Heʹlssen studiost. Govva: IYUNO Media group

Pieʹllkuõiʹmin mättʼtõʹlle sääʹmǩiõl

Muumstääll Teemu Titola lij mâʹte määŋg nuõrr nuõrttsäʹmmla. Päʹrnnpoodd 90-lååǥǥast son vaaʹʒʒi škooul Akujääuʹrest, koʹst vuäǯǯai muäʹdd čiâss neäʹttlest nuõrttsääʹmǩiõl mättʼtõõzz. Sõrgg kuuitâǥ leäi äiʹǧǧ vaajted šuurab Âʹvvel škoouʹle, koʹst mättʼtõõzz leäi vaiggääb riâššâd.

Titola mošttai, mäʹhtt leäi vuõššân õhttu sääʹmǩiõl čiâssin ij-ǥa tõt leämmaž šiõǥǥ siõm päärnže.

Oʹđđest son vuõʹlji mättʼtõõllâd sooǥǥâs ǩiõl eʹpet vuõrâsooumžen. Pieʹllkueiʹmm vuäǯǯai vuõššân jurddi vueʹlǧǧed eeʹjj piʹštti škooultõʹsse da leäi juʹn vuõltteʹmmen põʹmmjid, ko raukkli Titola vueʹlǧǧed mieʹldd.

– Son haaʹlii tõn ǩiõl mättʼtõõttâd da piiji teʹl muʹnne še teäddõõzz, što tät lij tuu kulttuur. Teʹl mon sarnnum suʹnne, što jõs ton mõõnak, nuʹtt teʹl muʹst feʹrttai še pueʹtted.

Ko son smeâtt obb škoouleeʹjj miârktõõzz jieʹllmasas, jie åummast jiânnai sääʹn kaunnu.

– Leäm kâʹl tuõđi sääʹntem, ko smiõttam tän. Täʹst lij nuʹtt jõnn miârktõs muʹnne.

Tååimteei Sara Wesslin vuõʹlji ǩieʹsskueʹss Teemu Titolain poorrâd jiõŋŋõõzz da seämmast mainstâʹlle suu jie´llem pirr. Jietna: Sara Wesslin / Yle

Ǩiõllpääʹljes vaaʹldi Titola mieʹldd jõnn kulttuurtuõjju da näkkam tååimaivuiʹm son haaʹleʹči puõʹttiääiʹj še juäʹtǩǩed. Son tuäivv, što sääʹmǩiõlin vueiʹttep jeänab tuejjeed tuâj puõlvvõõǥǥi rääi.

Ǩiõl mainsteeʹjen son haaʹlad älšsmâʹtted jeärrsid da vieʹǩǩted. Ǩiõlltååim vueʹlǧǧe aivv siõm šõddmõõžžin di tuâjain.

– Õõut neäʹttel-loopp leʹjjim Âʹvvlest Kuulas-põõrtâst da toʹben leʹjje muäʹdd sääʹmpäärna räʹppjeʹmmen säämas. Kâʹl feʹrttji juʹn påǥsted, mõõn puârast suännast mõõni tõt. Tääzz lij päiʹǩǩ da õinn feʹrttjeʹči tuejjeed jeänab kulttuur ooudâsviikkmõõžž ouʹdde, smeâtt Titola.

Õhtt idea leʹčči tåimmad ǩiõllkueiʹmmen sääʹmpäärnaid. Nåkkam puärraz son leʹčči jiõčč tuäivvam jieʹllmasas teʹl, ko leäi mättʼtõõllmen õhttu sääʹmǩiõl.

– Päärnaž kâʹl taarbaš nåkkam vuõrâsoummu, kååʹtt maainast suin säämas da čuäʹjat ouddmiârk.

Yle Sääʹmm vuõlttad Ǩieʹsskueʹss-prograamm vuõssaarǥ da piâtnâc čõõđ ǩieʹzz. Prograamm vuäitak kuvddled Yle Areenast še.

Varrasamosat

Muualla Yle.fi:ssä