Sápmi |

Kirste Paltto ja Petteri Laiti nammaduvvoba Lappi universitehta gudnedoavttirin

Gudnedoavttir lea árvonamma man universitehta dieđagoddi addá ja dat lea bajimus gudnečájáhus.

Kirsti Paltto, Kirste Paltto
Jovnna-Jon-Ánne Kirste, Kirste Paltto lea buvttadan girjjiid jagi 1971 rájes. Govva: Linnea Rasmus / Yle

Girječálli Kirste Paltto ja duojár Petteri Laiti nammaduvvoba Lappi universitehta gudnedoavttirin. Gudnedoavttir lea árvonamma man universitehta dieđagoddi addá ja dat lea bajimus gudnečájáhus. Paltto nammaduvvo servodatdiehtagiid gudnedoavttirin ja Laiti fas dáidaga gudnedoavttirin.

Lappi universitehta nammadage dán giđa oktiibuot 18 ođđa gudnedoaktára. Lappi univeristehta hálida addit gudnedoaktára árvvu dakkár olbmuide, geat leamašan ovddideame universitehta dutkan- ja oahpahusodoaimma ja leat iežas bargguin maiddái ovddidan riikkaidgaskasaš ovttasbarggu ja dahkan lappilaš kultuvrra dovddusin.

Petteri Laiti
Mihkku-Biehtár, Petteri Laiti lea dovddus duojár. Govva: Terhi Tuovinen

Lappi universitehta ordne miessemánus golmmabeaivásaš akademalaš ávvudoaluid, gos ođđa Paltto ja Laiti guovttos bajiduvvoba gudnedoavttirin. Maiddái Monaco Fursta Albert II vihahuvvo seamma áigge Lappi universitehta gudnedoavttirin.

Sámisostera vuođđudeaddji ja doaimmajođiheaddji Ristenrauna Magga vihahuvvui diibmá Tampere universitehta gudnedoavttirin ja son lei vuosttaš sápmelaš nissonolmmoš Suomas, guhte lea ožžon gudnedoaktára árvvu. Eará sápmelaččat, geat leat ožžon gudnedoaktára árvvu, leat Nils-Aslak Valkeapää, Samuli Aikio, Pekka Aikio ja Matti Morottaja.

Varrasamosat: Sápmi

Váldoođđasat

Varrasamosat

Muualla Yle.fi:ssä