Sápmi |

Kirste Palttos almmustuvvan ođđa mánáidgirji – Maiddái nubbi vuordimis

Jođašeaddji násti doalvu lohkkiid gomuvuhtii ovttas Ritniin ja Urbániin.

Kirsti Paltto, Kirste Paltto
Kirste Palttos lea almmustuvvan geassemánus ođđa mánáidgirji, Jođašeaddji násti. Govva: Linnea Rasmus / Yle

Girječálli Kirste Paltto lea čállán ođđa mánáidgirjji Jođašeaddji násti. Girji almmustuvai geassemánu beallemuttus ja dan lea goasttidan Davvi Girji -lágádus.

Girji muitala guovtti gánddas, Ritnis ja Urbánis, geat leaba beassamin ođđa fearániidda, go oaidniba stoahkanšiljus uhca ruoná spáppaža. De boahtá gánda, geas leat ruoná biktasat ja hástá gándda guoktá mielde jođašit.

– Nu dat gándda guovttos vuolgiba dan nástti fárrui, muitala Paltto.

Jođašeaddji násti mielde sii sáhttet johtit guhkás gomuvuhtii, gos orruba njealjeoaivvat stállu ja mánnolakkis.

– Ritni ja Urbán oahppaba máŋga ášši dien mátkkis ja oidnet máŋga ipmaša, maid eaba leat eatnan alde oaidnán.

"Ferten váldit álo vuhtii, ahte ii galgga menddo čergosis áššiid čállit"

Kirste Paltto muitala, ahte lea ovdal láven čállit eatnama stáluid birra, muhto dál de bođii millii iskat gomuvuođa stáluid birra čállit.

– Dat mii lea dovdameahttun, dat geasuha mánáid. Muhto dat ii leat mange láhkai balddihahtti girji. Go mun dovddan daid mánáid geaidda mun daid čálán, de ferten váldit álo vuhtii, ahte ii galgga menddo čergosis áššiid čállit, oaivvilda son.

Palttos lea gal juo nubbige mánáidgirji vuordime almmustahttima.

– Dat muitala fas áibbas eará áššiid go dát Jođašeaddji násti. Dat muitala dan birra go šilljomiessi ja šilljoáldu jávkkaba, ja de vuolgá Bievla-nammásaš nieida ja bussá ohcat daid, muitala Paltto boahttevaš girjji sisdoalus oanehaččat.

Varrasamosat: Sápmi

Váldoođđasat

Varrasamosat

Muualla Yle.fi:ssä