Sápmi |

Klemetti Näkkäläjärvi lea bivdán earu sámedikki ságadoalli barggus sápmelašmeroštallama dihte

Klemetti Näkkäläjärvi lea bivdán earu sámedikki ságadoalli barggus ja buot sámedikki luohttamušdoaimmain. Son almmuhii áššis bloggastis gaskavahku ja sámediggi lea maid sádden áššis dieđáhusa. Näkkäläjärvi dadjá, ahte ii velge doarjjo ILO 169 -soahpamuša ratifiserema, vaikke vuoigatvuohtaministtar mearridii maŋŋebárgga, ahte ii gease ratifiserenevttohusa eret riikkabeivvin.

Ságadoallit jienasteami maŋŋá 10.3.2015
Sámedikki ságadoallit riikkabeivviid ovddabealde maŋŋebárgga. Govva: Pirita Näkkäläjärvi / Yle

Klemetti Näkkäläjärvi čállá bloggastis, ahte son lea gaskavahku bivdán sámedikkis ja stáhtaráđis earu sámedikki ságadoalli barggus ja buot eará sámedikki luohttámušdoaimmain.

– Mu blogga boahttá ná ihkku, daningo háliidin ilmmuhit áššis dakkaviđe ja oažžut maid alccesan ráfi.

Sámediggi lea maid sádden áššis dieđáhusa.

Sámedikki stivra ja čoahkkin čoahkkanit nu jođánit go vejolaš. Ságadoallin dán áigge doaibmaba várreságadoalliguovttos Tiina Sanila-Aikio ja Heikki Paltto. 

Sivvan earu bivdimii dat, go kompromissasápmelašmeroštallan ii mannan čađa

Sivvan Näkkäläjärvi earu bivdimii lea dat, ahte sápmelašmeroštallama nuppástuhtin ráđđehusa evttohusa mielde ii lihkostuvvan.

Sámedikki dieđáhusas namuhuvvo, ahte Klemetti Näkkäläjärvi oaidná, ahte riikkabeivviid mearrádus seailluhit dálá sápmelašmeroštallama bidjá vára vuollái sámiid eamiálbmotsajádaga.

– In lean goassige govahallan, ahte guođálin sámedikki dáinna lágiin ja ná ahkidis dovdamušaid siste. Bohten sámediggái ulbmiliin duddjot sápmelaččaide buoret boahtteáiggi, muhto riikkabeaivvit lea dahkan dáid ulbmiliid duššin. Lean hui behtton, morašlaš ja vasáškan. Vuolgin ii soaitte leat gutnálaš, muhto sáhtán aŋkke dadjat ahte mus lea sápmelaš iešdovdu, árvvut ja prinsihpat báhcán.

Näkkäläjärvi ii velge guottit ILO-ratifiserema

Klemetti Näkkäläjärvi kommentere bloggastis maid viggamušaid oažžut ILO-soahpamuša ratifiserenevttohusa ain čađa riikkabeivviin. Vuoigatvuohtaministtar Anna-Maja Henriksson mearridii ikte, ahte ii gease ILO-evttohusa eret riikkabeivviin.

– Stuorimus earenoamášvuohta soaitá leat dat, ahte muhtin sámediggelahtut (geat eai mana oba sámedikki dievasčoakkámiinge) leat doarjalan, ahte Suopma ratifiserelii ILO 169 -soahpamuša almmá mangelágán ravdaeavttuid haga. Oalle stuora ILO-rahkan lea geasuhan muhtin sápmelaččaid. Vuovddi ii oainne muorain.

– Mun in sáhte dán dilis ávžžuhit, ahte Suopma ratifiserelii ILO 169 -soahpamuša, daningo dat ii leat mu árvvuid ja dievasčoakkáma mearrádusaid mielde.

– ILO 169 -soahpamuš ja sámediggelága ođasnuhttin leaba njađđojuvvon oktii maid ráđđehusa evttohusas ILO 169 -soahpamuša ratifiserema várás. Jos Suopma ratifiserelii dál soahpamuša, de dat basalii gieđaidis ja sáhtálii riikkaidgaskasaš arenain rámpot iežaset earenoamásvuođa álgoálbmotvuoigatvuođaid ovddideamis ratifiseredettiinis soahpamuša.

Klemetti Näkkäläjärvi mielas soahpamuša ratifiserejeaddjit doarjalit njuolga daid sehkkii, geat vuostálastet sápmelaččaid álgoálbmogin. Olles bloggačálus lea dáppe.

Klemetti Näkkäläjärvi doaimmai sámedikki ságadoallin jagi 2008 rájes. Son lea RÁB riikkabeaievttohassan Uusimaa válgabires.

Varrasamosat: Sápmi

Váldoođđasat

Varrasamosat

Muualla Yle.fi:ssä