Sápmi

Ko Essi já Saammâl Morottaja eeđáin táátum, lâi umogâš fáárust alttarist já kyesih lijjii tuš muádis

Essi ja Saammal Morottaja
Ubâ perrust lâi mááccuh pajalist. Govva: Heli Huovinen

Spiekâstâhtile räijee tilálâšvuođâi uásálisteemere tuš love olmožin. Taan hejâpaarân tot ij lamaš vädisvuotâ, mutâ solâstittem velttim lâi suámálâš.

Aanaarliih Essi Saammâl Morottaja uážžoin nubijdis, ko maailm lâi uáli jo eromâš tiileest. Tuorâstuv njuhčâmáánust Aanaar sämikirhoost čuojâi Myrskyluodon Maija, ko myerssee lavkkij alttarân mááccuh pajalist.

Suoi uážžoin ettâđ nubijdis táátum já eidu tot lâi tehálumos.

– Saammâl ij lamaš hommám suormâs. Sun tuoijui taggaar muorâst ovdebáá peeivi, myerssee muštâl.

Perruujesâneh fáárust njuolgâ video-ohtâvuođáin

Piäiváás já pieggiis ehidispeiviv muorâst rahtum kirho peeŋkâid čokánii tuš muáddi kyesi. Čokkânemraijiittâsâid, moid Suomâ staatâ lâi meridâm, lâi pággu tottâliđ, ige kiirkon uážžum puáttiđ eenâb ko love olmožid.

Čokkânemraijiittâsâi tiet vihkâmseremonian pessii uásálistiđ tuš muáddi paarâ aldaulmuu. Video-ohtâvuođáin lopádâsâid puovtij vuolgâttiđ njuolgist meid ovdâmerkkân myerssee iänán.

Essi ja Saammal Morottaja
Čokkânemraijiittâsâi tiet vihkâmseremonian pessii uásálistiđ tuš muáddi paarâ aldaulmuu. Video-ohtâvuođáin lopádâsâid puovtij vuolgâttiđ njuolgist meid ovdâmerkkân myerssee iänán. Govva: Heli Huovinen

Heejâi uásild kuosij mere raijim ij lamaš älkkee. Aldaulmui lasseen pääihi alne lii pággu leđe pappâ já kanttor.

Uđđâ näimipaarâ muštâl-uv, ete stuárráámus uási huolhijn koolgâi pääcciđ meddâl heejâin. Ovdâmerkkân myerssee enni ij peessâm pääihi oolâ fyysilávt, mutâ sun uásálistij tilálâšvuotân WhatsApp-suáitu peht. Motomeh myerssee olgoenâmist ässee hyelhih pessii čuávvuđ heejâid Facebook live -ohtâvuođáin.

– Lâi kale váhá váiváá, ko ij uážžum solâstittiđ kiännán, Essi Morottaja ruáhásist.

Kyesih kolgii toollâđ torvokooskâid. Sijjân ij uážum adeliđ kieđâ ige solâstittiđ. Tom lasseen parâkode váhá paijeel mánuppaje puáris nieidâš peesâi uásálistiđ vihkâmân eeni askeest.

–-Umogâš lâi meid fáárust já kihheen ij puáhtám keččâđ suu piärán taam tile tiet. Valdim suu fáárun alttârân talle jieš, ko sun vaaibâi leđe voovnâin, myerssee muštâl.

Essi ja Saammal Morottajan häät.
Vihkeepappâ Mari Valjakka Aanaar servikoddeest muštâl, ete sij čuávuh ravvuid tárkká. – Jiem kale tärhistâm kuosij ave, sij urruu lemin nuuvt nuorah, sun ruáhásist. Govva: Heli Huovinen

"Lâi olmânáál porgâđ tom eidu tääl "

Morottajah lává tuođâi luholiih, ige spiekâstâhtile väivid. Eidu nubijkulij. Suoi tuáivoin uccâ seremonia já halijdáin naaijâđ eidu tääl, ovdil sunnuu nieidii kästim.

Suoi iän lamaš ostâm vuáváđ heejâid teikkâ vuolgâttiđ povdiittâsâid. Tondiet sunnui ij šoddâm pettâšume. Tilálâšvuotâ lâi paarâ mield tuođâi kuoskâtteijee já tievâ tubdâmušâid. Eidu taggaar, ko koolgâi-uv.

– Vihkum maŋa lâi kal ihana tobdo, veikkâ heejah lijjii-uv tuođâi uceh. Seremonia lâi nuuvt muččâd já lâi tobdo, ete lâi olmânáál porgâđ tom eidu tääl, Essi Morottaja iätá.

Tilálâšvuođâ já savâstâlmij maŋa kyesih vuolgii jieijâs paihijnis káhvástâllâđ. Mutâ juhleh iä lamaš tuše täst. Maŋeláá, ko tile suává, láá talle stuárráábeh juhleh.

– Kiergânhân maŋeláá talle toollâđ stuárráábijd juuhlijd, Saammâl Morottaja muštâl.

Varrasamosat

Muualla Yle.fi:ssä