Veahkkeprofessor ja doseanta Sanna Valkonen ja su bargojoavku oaččui dán jagi 325 000 euro veahkkeruđa Kone-foanddas.
Fidnu ulbmilin lea buvttadit ođđa vuogi mot gieđahallat sápmelaččaid kulturárbbi diehtaga, dáidaga ja duoji vugiin. Bargojoavkku eará lahttut leat Áile Aikio, Sigga-Marja Magga, Mikkâl Morottaja, Áilu Valle, Stina Roos ja Marja Helander.
Siida-skuvla -prošektii 191 400 euro
Stuorra veahkkeruđa oaččui maiddái dutkanprofessor Rauna Kuokkanen ja su bargojoavkku Siida-skuvla -nammasaš fidnu. Dát guovttejahkásaš sámedutkiid, -dáiddáriid ja -aktivisttaid oktasaš prošeakta figgá rekonstrueret ja simuleret dan, mo ja makkár vuogádagaid vuođul siida sáhttá dán áigge doaibmat.
Fidnu figgá maiddái dálá sámeservodaga dekoloniseremii siidavuogádaga ja dasa guoskevaš dáhpelága ealáskahttima ja geavahussii váldima bokte.
Eará bargojoavkku lahttut leat Anne-Maria Magga, Oula-Antti Labba, Beaska Niillas, Niillas Holmberg, Aura Pieski, Aslak Holmberg, Asta Balto, Sunna Valkeapää, Suvi West, Tomi Guttorm, Anne Olli, Philip Burgess, Kirste Paltto sihke Jenni Laiti ja Petra Laiti.
Anarâškielâ-searvi: 1 000 siiddu nuoraidgirjjálašvuođa anárašgillii 60 000 euro
Dáinna fitnuin Anarâškielâ-searvi háliida buvttadit anárašgillii ođđa nuoraidgirjjálašvuođa 12-18 -jahkásaš nuoraide.
Prošeavttain háliidit buoridit anárašgielat girjjálašvuođa dili ja jorgalit lasi girjjiid anárašgillii jagiin 2019-2020 áigge. Ulbmilin lea, ahte nuorat ieža besset fárrui jorgalandoaimmaide.
Doavttirstudeanta Anne-Maria Magga nákkosgirjedutkamuššii 28 800 euro
Mo álgoálbmogiid ja elliid gaskasaš hálddašanmállet sáhttet doaibmat dálá áigge kolonialisttalaš stáhtas, mii ii dovddas daid leahkima?
Dutkamušastis Anne-Maria Magga dutká boazodoalu siskkáldas hálddašeami ja lágaid sámiid jurddašeami vuođul ja hástala ná oarjemáilmmi stáhta- ja olmmošgaskasaš teoriijaid.
Skábmagovat eamiálbmogiid filbmafestiválii 30 000 euro
Eamiálbmogiid filbmafestivála Skábmagovat ávvuda boahtte jagi 20-jahkásaš bálgá 24-27.1.2019 Anáris.
Boahtte jagi festivála temán leat Saha dásseválddi eamiálbmogat. Dasa lassin festiválas ávvudit árktalaš álbmogiid ovttasbarggu ja lokte maiddái roahkkadis sámi filbmadahkkiid oktii.
Battle – máŋggagielat ja -dáiddalaš lávdedáiddaduodji 7 933 euro resideansadoarjja
Dáiddárjoavku, mas leat máŋggaid surggiid dáiddárat dahke ovttas čájáhusa, mas musihkkárat ja dánsut besse čájehit ođđalágan lávdedáidaga.
Ballerina Auri Ahola ovttas bargojoavkkuinis háliida dahkat njealji gillii lávdedáidaga, mas ovttastahttit musihkka, dánsuma ja improvišuvnna. Ulbmilin lea, ahte dáiddaduoji sáhttá dolvo skuvllaide, olgolávddiide, restoráŋŋii dahje boarrásiid vissui.
Buot dieđuid Kone-foandda mieđihan veahkkeruđain ja -doarjagiin gávnnat dás.
