Davvi-Suoma rádjegávppis leat leamašan hástalusat jo badjelaš jagi koronadili dihte ja dilli ii leat buorránan dánge rádjai.

Dábálaččat giđđasesoŋŋa livččii dál buoremus muttus. Dál gávppiid kundarmearri lea gahččan badjel 80 proseantta, go Norgga bealde ii beasa johtit Suoma beallái.

Njávdánlaš gávpejas Jari Kekäle ii hálit oba rehkenastitge olugo son boahtá dáhpet ruđalaččat amas massit nahkáriiddes.

– Diimmá beassážat manne seamma láhkai ja dál maid leat ráját gitta, de eai dat kundarat olus leat. Dáhpen olles áigge, dasa ii veaje maidige. In álgge gal rehkenastit dan, dasgo muđui massán gal nahkáriiddán.

Gáregasnjárgalaš gávpejas Seppo Härkönen lea seamma dilis.

– Ná heittot dilli ii leat leamašan goassige mu eallimis, iige oba dieđe man guhká dát joatkašuvvá. Dát dilli lea buot bargiide ja fitnodagaide dáppe Gáregasnjárggas hui váivi, šuohkiha Härkönen.

Härkönen lea gártan maid geahpedit bargiidis bargoáiggi. Oassi su bargiin barget guokte beaivve vahkus, oassi fas golbma beaivve. Muhtimat leat gal gártan báhcit eret barggus.

– Ferte muitit, ahte ii gánnet goddit dan gusa, mas oažžu mielkki. Bággu lea bargat ná, vai ruđat reahkkájit geassái.

Oarjerájá alde dilli vehá loažžadut

Ruoŧa rádjeguovlluin oarjin ii leat seamma vearrás dilli biebmogávppiid bealde, muitala Lappi gávpegámmára gávpe- ja rádjegávpeváljagotti ságajođiheaddji Jukka Lakkapää.

Spesiálagávppiid kundariin sullii bealli leat Ruoŧa beale olbmot, muhto Oarje-Lappis leat suopmelaš turisttat goittot muhtin veardde veahkehan dán dilis.

Lakkapää ii jáhke, ahte oarjerájá gávppit koŋkánit, muhto Norgga rájá alde dilli lea vearrái jus dakkár ráddjehusat bistet vel guhká.

– Suopmelaš rádjegávppiin oarjerájá alde leat álo leamašan eambo suopmelaš kundargoddi. Ruoŧŧa lea addán goittotge buori lasáhusa. Dilli ii leat seammalágan dego Norgga rájá alde, gos 90 proseantta kundariin leat Norgga bealde. Dilli doppe lea hui duođalaš, ii oktage gierdda guhká dakkára, lohká Lakkapää.

Stáhta viggá doarjut rádjegávppiid

Rádjegávppit dárbbašit dál stáhta doarjaga, muhto buot gávpejasat eai leat dan ohcan dahje ožžon.

Vuosttas doarjjaohcamis Gáregasnjárgga gávpeguovddáš Härkönen Oy lea ožžon suoidnemánus 34 578,52 euro ja borgemánus 367, 38 euro. Gávpeguovddáš Nuorgam Oy oaččui juovlamánus 35 233,55 euro ja Kilpishalli Oy borgemánus 41 068,36 euro.

Njávdáma gávpejas lea ožžon doarjaga neahttagávppi ovddideapmái.

– Oaččuimet Businessfinlandis ruđa gávppi digitaliseremii. Dasa leat dál geavahan áiggi, vai lea juoidá maid bargat. Datge prošeakta álgá leat gárvvis, ferte hutkat juoidá eará dál, muitala Jari Kekäle.