Sápmi |

Koronaboahkuheamit ovdánit sámegielddain iešguđet fárttain – Ohcejogas boahku ožžot jo badjel 40-jahkásaččat

Anáris, Soađegilis ja Eanodagas boahkuhit dál easka badjel 60 jahkásaččaid ja riskajoavkkuid. Gielddat leat oččodeame stuorát meriid boahkuid lagaš vahkkuid áigge.

Koronarokotetta pistetään olkapäähän.
Koronaboahkuheamit ovdánit sámegielddain iešguđet láhkai. Govva: Kalle Niskala / Yle

Koronaboahkuheamit ovdánit sámegielddain iešguđet fárttain. Ohcejogas boahkuhišgohtet dál jo badjel 40-jahkásaš gieldalaččaid.

Anáris, Soađegilis ja Eanodagas fas boahkuhit easka badjel 60 jahkásaččaid ja riskajoavkkuid.

Ohcejoga gielddas leage dál sámegielddaid buoremus boahkuhanproseanta, go doppe badjel 40 proseantta badjel 15-jahkásaš gieldalaččain leat ožžon vuosttaš boahkuhusa. Jođiheaddji doavttir Heidi Eriksen muitala, ahte gielda lea ožžon boahkuid bures.

– Mishan leat uhccán olbmot, de eai dárbbaš máŋga olbmo boahkuhit, go prosentuálalaččat dat lokte hui bajás dan proseantta. Dieđusge lea buorre ja somá, ahte muhtumin beaggit positiivvalaččat, dadjá Eriksen.

Eriksena mielde ohcejohkalaččat leat váldán viššalit boahkuhusaid.

– Jus mii háliidit beassat dán dilis monu goas nu, de gal dat lea dat čoavddus, oaivvilda Eriksen.

Heidi Eriksen
Ohcejoga jođiheaddji doavttir Heidi Eriksen muitala, ahte gieldda boahkkodilli leamašan buorre. Govva: Vesa Toppari / Yle

Liisanantti: “Buot 60-jahkásaččat ožžot boahkuhusa gieldda bokte”

Anára jođiheaddji doavttir Outi Liisanantti mielde badjel 70-jahkásaš anárlaččain lea boahkuhuvvon jo 93 proseantta. Dál vuorus leat buot badjel 60-jahkásaččat.

Liisanantti háliida njulget gieldda dieđáhusa das, ahte vuos boahkuhusa oččose bargoeallima olggobealde leahkki olbmot.

– Álgojurdda lei, ahte dat badjel 60-jahkásaččat geat leat barggus, oččoše boahkuhusa bargodearvvašvuođafuolahusa bokte. Muhto go boahkut eai leat oažžumis nu olu, de eat ráddje olbmuid. Buohkat geat háliidit, ožžot boahkuhusa gieldda bokte, čilge Liisanantti.

Gielddat leat oččodeame stuorát meriid boahkuid lagaš vahkkuid áigge. Buot boahkut juhkkojuvvojit Lappi buohccidikšunbire bokte dássedit iešguđet gielddaide. Liisanantti mielde boahkuheapmi joatkašuvvá geassetge.

– Mii leat rekryteren dearvvašvuođadivššáriid bargui, vai basttit joatkkit boahkuhemiid olles geasi.

Ivalon johtava lääkäri Outi Liisanantti terveyskeskuksen käytävällä eristystilan edessä
Anára jođiheaddji doavttir Outi Liisanantti illuda, go olbmot háliidit váldit koronaboahkuhusa. Govva: Vesa Toppari / Yle

Gieskat beakkehii, ahte Soađegilis olbmot ledje riŋgen boahkuheami áigevárremii nu olu, ahte dearvvašvuođabargit gárte burgit ráiddu máŋga beaivvi. Maiddái Anáris olbmot riŋgedit viššalit ja háliidit jođánepmosit beassat boahkuhussii.

– Lean hui ilus, ahte olbmot háliidit boahku. Dieđusge leat muhtimat, geat eai das beroš, muhto unnán gal leat dakkárat. Suodji korona vuostá ja vejolaš linnjemat boahkkopássas motiverejit olbmuid váldit boahkuhusa, jáhkká Outi Liisanantti.

Boahkuid mearri lassána

Sosiála- ja dearvvašvuođaministeriija dieđuid mielde Suomas leat addojuvvon dassážii jo badjel guokte miljovnna boahkkoaddosa. EU mihttomearrin lea, ahte borgemánu rádjái rávesolbmuin 70 proseantta livčče ožžon boahkuhusa.

Ministeriija dorvvolašvuođa- ja dearvvašvuođaossodaga ossodathoavda Taneli Puumalainen mielde Suopma olaha mihttomeari jođáneappot.

– Jáhkkimis buohkat geat háliidit, ožžot vuosttaš boahkuhusa geasi áigge, dadjá Puumalainen.

Supmii leat boahtime lagaš vahkkuid ain juo 240 000 boahkkoaddosa ja geassemánu álggus mearri vel loktana.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä