Sápmi

Koronaboahkuhusat soitet bisánit Lappis máŋgga vahkkui, go boahkuhanávdnasat eai leat oažžumis – Broas: “Davvin buoret dilli go máŋggain eará guovlluin”

Ođđa olmmošjoavkkuid eai soaitte beassat boahkuhit ovdal go guovvamánu bealle muttu maŋŋá.

ylilääkäri Markku Broas
Lappi buohccedikšunbiire infekšuvdnadoavttir Markku Broas dadjá, ahte davvin lea buoret dilli boahkuhusaid ektui, go máŋggain eará guovlluin Suomas. Govva: Yle

Koronavirusboahkuhusat soitet bisánit Lappis máŋgga vahkkui, go dálkkasfitnodagat eai bastte doaimmahit boahkuhanávdnasiid doarvái jođánit.

Dassážii Lappi gielddat leat goit boahkuhan dearvvašvuođabargiid, akuhttabuhcciid ja vuoras beavttálmahtton ássama áššehasaid buriin fárttain, muitala Lappi buohccedikšunbiire infekšuvdnadoavttir Markku Broas.

Ođđa joavkkuid eai goit soaitte beassat boahkuhit ovdal go guovvamánu bealle muttu maŋŋá. Sivvan lea dat, go dat geat vuosttaš vuorus leat ožžon boahkuhusa, galget vuoruhuvvot maiddái nuppi boahkuhusa oažžumis.

– Dáin doaimmahusmeriin mat dál leat, de eat beasa boahkuhit ođđa joavkkuid árabut. Jus AstraZeneca oažžu vuovdinlobi boahtte vahkus, de oažžut lasi boahkuhemiid. Muhto dat ii jođálmahte min barggu, čilge Broas.

Ovdamearkka dihte Anára gielda boahkuha vel dán ja boahtte vahkus riskajoavkkuid, muhto dálá dieđu mielde čuovvovaš háve boahkuhusaid ožžot easka njukčamánu álggus.

Hástalus oažžut lasi boahkuhanávdnasiid

Lappi buohccedikšunbires lea ulbmilin boahkuhit ođđajagimánu áigge badjel 4 000 olbmo. Boahkut čuggejuvvojit guktii, válmmašteaddji rávvaga mielde nuppádassii 3–6 vahku geažes vuosttas čuggemis.

Lappi buohccedikšunbire lea ožžon dassážii oktiibuot badjel 9 000 boahkuhusa BioNTech-Pfizer ja Moderna dálkkasfitnodagain.

Gielddat leat boahkuhišgoahtán olbmuid beaktilit ja doppe leat maid olu boahkuheaddjit. Broasa mielde Lappis ledje gaskavahkku 20.1. rádjái boahkuhuvvon oktiibuot 2 650 olbmo.

Stuorámus hástalus lea goit oažžut lasi boahkuhanávdnasiid, dadjá Broas.

– Jus oaččošeimmet boahkuhusaid olu ja dássedit, de sáhtašeimmet geargat jođánitge, muhto dál buot lea gitta dálkkasdoaimmaheaddjiid áigetávvaliin, dadjá Broas.

Lappi ožžon eanet boahkuhusaid go eará guovllut

Dálkkasfitnodagaid boahkuhanávdnasat juhkkojuvvojit Suomas ássiidlogu mielde. Lappi buohccidikšunbiire oaččui goit badjelmearálaš 4 800 Moderna-boahku dan geažil, go dan lea álki seailluhit ja davvin guhkes gaskkaid geažil dat álkidahttá maiddái fievrredeami.

– Mis lea dáppe davvin buoret dilli boahkuhemiid ektui, go máŋggain eará guovlluin Suomas, dadjá Broas.

Maŋemuš áiggiid leamašan maiddái ságastallan das, go Lappi lea ožžon ássiidlogu mielde eanet boahkuhusaid, go eará guovllut ja mo boahttevuođas galgá doaibmat, muitala Broas.

– Länsi-Pohja guovllus lea fuolla das, ahte sis lea vearrát koronadilli ja go sii maid gullet Lappii, de iigo sis leat maid riekti dasa. Ipmirdan bures sin oaivila, muhto eiseválddit dat mearridit mo boahkuhusat juhkkojuvvojit, dadjá Markku Broas.

Varrasamosat: Sápmi

Váldoođđasat

Varrasamosat

Muualla Yle.fi:ssä