Sápmi |

Koronavirus ii dagat dađi stuorát fuola sámegielddaid skuvllain – Dáiddadáhpáhussii oassálastin sagastahttá

Sámeguovllu skuvllat čuvvot oahpahusráđđehusa ja dearvvašvuođaeiseválddiid rávvagiid iežaset doaimmain.

Haartmanin sairaalan päivystyksen ikkunaan teipattu koronavirus-ohje. Lapussa kielletään tulemasta sisälle sairaalaan konsultoimatta ensin puhelimitse sairaanhoitohenkilökuntaa.
Suomas leat gávnnahan dassážii 40 koronanjoammuma. Govva: Silja Viitala / Yle

Máilmmis viidát leavvan koronavirus ii goittot doaisttážii leat dagahan erenoamáš fuola sámeguovllu gielddain Suomas. Suoma oahpahusráđđehus lea čohkken korona váras rávvagiid skuvllaide ja Davvi-Suopma čuovvu Lappi buohccidikšunbire addin rávvagiid.

Suomas leat gávnnahan dassážii 40 koronanjoammuma (maŋŋebárga 10.3.) Suomas gárte giddet olles skuvlla Kangasalas, lahka Tampere gávpoga, koronavirusa dihte. Eanáš oassi njoammumiin leat Helsset-Uudenmaa guovllus sihke Gaska-Suomas.

Koronavirus lea šaddan epidemiijan juo goittotge Nannán-Kiinnás, Iranas, Mátta-Koreas, Itálias, Tiroli guovllus Nuortariikkas sihke Duiskkas Nordrhein-Westfalenis.

Dálá dilis Ohcejoga, Eanodaga ja Anára gielddain skuvllat bissot rabasin ja dili čuvvot ráfálaččat.

– Mii čállit dieđáhusa váhnemiidda ja fuolaheddjiide, mas ávžžuhit sihkkarvuhtii, jus lea juobe uhca vejolašvuohta, ahte mánás livčče koronanjoammun, dadjá Ohcejoga gieldda čuvgehusdoaimma jođiheaddji ja rektor Eila Tapiola.

– Mii leat beaivádan virusepidemiija doaibmarávvagiid ja čuovvut dearvvašvuođaeiseválddiid rávvagiid, muitala Eanodaga skuvlla hálddahuslaš rektor Riitta Peltovuoma.

Anára čuvgehusdoaimmajođiheaddji Ilkka Korhonen dadjá, ahte maiddái Anáris čuvvot dárkilit oahpahusráđđehusa rávvagiid.

Soađegili gielda dieđiha, ahte eai ráddje skuvlla vázzima dahje barggus johtima, jus ii leat leamašan epidemiijaguovllus dahje lagaš kontávttas geainnanu, gii lea doppe leamašan.

Sámenuoraid dáiddadáhpáhus čohkke skuvllaid oktii – "Leago vejolaš searvat?"

Sámenuoraid dáiddadáhpáhus čohkke máŋggaid čuđiid sámemánáid ja -nuoraid miehtá Suoma Anárii cuoŋománu beallemuttus. Dáhpáhusa eai leat goittotge vel šluhttemin, muitala dáhpáhusa buvttadeaddji Unna-Maari Pulska.

Ohcejoga gieldda skuvllain dáhpáhussii searvamis ii leat leamašan dađi eambo sáhka, muhto Eanodagas ja Vuohču skuvllas Soađegilis ášši birra leat ságastallan.

– Mii leat háleštan áššis, muhto eat leat mearridan maidege, lohká Riitta Peltovuoma.

– Mii fertet gieđahallat čoahkkimis, ahte leago vejolaš vuolgit vai gánnehago bissut skuvllas. Fertet smiehttat maid galgat dahkat, ja makkár dat dilli lea dalle, čilge Vuohču skuvlla veahkkejođiheaddji Marja Magga.

Anára gieldda skuvllat eai leat hállan ášši birra. Čuvgehusdoaimmajođiheaddji Ilkka Korhonen ii oainne siva, manin gieldda skuvllat eai sáhtaše oassálastit dáhpáhussii.

– Dathan lea Sámedikki duohken, dál goittot in oainne siva manin ii. Eai dáppe davvin leat nu galle koronanjoammuma, oaivvilda Korhonen.

Skuvllat šluhttejit leairaskuvllaid

Skuvllat miehtá Suoma leat šluhttegoahtán leairaskuvlatuvrraid olgoriikkaide. Oahpahusráđđehus ii bastte gieldit mátkkošteami, muhto Suoma olgoministeriija ii ávžžut mátkkoštit epidemiijaguovlluide.

Sámegielddaid skuvllain eai leat plánen leairaskuvlatuvrraid.

Anára gielda lea mielde Eurohpa uniovnna Erasmus+ skuvlen-, nuoraid-, ja valáštallanprográmmas. Gieldda čuvgehusdoaimmajođiheaddji mielde sii árvvoštallet mátkkošteami, jus dasa šaddá dárbu.

– Mii fertet árvvoštallat dili dalle, go livčče vuolgga. Koronavirus-dilli rievdá olles áiggi, lohká Ilkka Korhonen.

Varrasamosat: Sápmi

Váldoođđasat

Varrasamosat

Muualla Yle.fi:ssä