Sápmi |

Koronavirus ii váikkut Sámedikki juolludan kulturmearreruđaide, vaikko ruđat bázáše dán jagi geavatkeahttá

Kulturmearreruđain lea guovtti jagi geavahanáigi.

Satasen euron seteleitä.
Sámedikki jahkái 2020 juolludan kulturdoarjagiid sáhttá geavahit vel boahtte jagi. Govva: Jyrki Lyytikkä / Yle

Fárttáin leavvan koronavirus lea váikkuhan iešguđetlágán dáhpáhusaid ordnemii maiddái Sámis. Ovdamearkka dihte Heahtá Márjjábeaivvit leat šluhttejuvvon koronavirusa dihte.

Heahtá Márjjábeaivvit ledje okta dain dáhpáhusain, masa Sámedikki kulturlávdegoddi lea juolludan ođđajagimánus kulturmearreruđa.

Sámedikki kulturlávdegotti jahkái 2020 juolludan kulturmearreruđaide koronavirus ii váikkut, váikko ruđat bázáše dan jagi geavatkeahttá.

Sámedikkis muitalit, ahte kulturmearreruđain lea guovtti jagi geavahanáigi.

– Dat leat juolluduvvon jagiide 2020–2021. Aŋkke dán muttus ii leat dárbu reageret, dadjá Sámedikki kulturčálli Riitta Orti-Berg.

Sámedikki kulturdoarjagiid mákset oahpahus- ja kulturministeriija mieđihan stáhtadoarjagiin.

Norgga Sámediggi ii gáibit doarjagiid ruovttoluotta

Maiddái Norggas besset ain geavahit doaibmadoarjagiid, vaikko dáhpáhusat šluhttejuvvojit. Norgga Sámediggi dieđiha neahttasiiddustis, ahte sii eai gáibit ruovttoluotta juolluduvvon doaibmadoarjaga lágidemiide, maid ealáhusat eai sáhte lágidit koronavirusa dihte.

Sámediggi ipmirda bures, ahte koronavirus čuohcá sámi ealáhusaide ja ásahusaide, ja muđui kultureallimii, čállá Norgga Sámediggi neahttasiiddustis. Danin Sámediggi dohkkeha, ahte prošeavttat maŋiduvvojit.

– Mii eat gáibit ruovttoluotta doarjaga sis geat ožžot mis fásta doaibmadoarjaga lágidemiide maid eai sáhte čađahit koronavirusa geažil, lohká sámediggepresideanta Aili Keskitalo.

Varrasamosat: Sápmi

Váldoođđasat

Varrasamosat

Muualla Yle.fi:ssä