Säämi |

Koronavirus vaaigut meid Hollandist ässee anarâšâi elimân – “Jieččân uáinust tuáivuččim, ete taat nuvâččij nuuvt jotelávt ko máhđulâš”

Koronavirus lii tovâttâm Marja-Liisa Olthuisin lasepargoid já epivises puátteevuođâ tiet lii vaigâd suunâttâllâđ aašijd.

Mies jolla on hengityssuoja kasvoillaan Berliinissä.
Hollandist láá tääl 2051 koronanjuámumid. Kove lii valdum Saksast. Govva: Alexander Becher / EPA

Siämmáánáál ko Suomâst, meid Hollandist ulmuuh pargeh ennuv káiduspargoid já tobbeen-uv škoovlah láá lamaš muáddi peeivi kiddâ. Marja-Liisa Olthuis áásá perruinis Hollandist. Tääl sun já suu párnááh láá pääihist.

– Párnááh lijjii vuossâmustáá hirmâd moovtâ, ete ij taarbâš vyelgiđ škoovlân, mutâ tuotâvuotâ, lii et taat ij lah luámu, mutâ kalga meid porgâđ maidnii, sun muštâl.

Sij iä kuittâg vala tieđe mon kuhháá pargeh pääihist.

– Jieččân uáinust tuáivuččim, ete taat nuvâččij nuuvt jotelávt ko máhđulâš, sun muštâl.

Olthuis parga máttáátteijen, mutâ eidu tääl epivisesvuotâ toovvât ennuv pargo. Tääl sun ij pyevti suunâttâllâđ aašijd mánuppoojijd ovdâskulij, pic ferttee jurdâččiđ ohoi mield.

– Váddásumos taan tiileest lii lamaš tot, ete ferttee tuođâi-uv tiettiđ hirmâd ennuv, veikkâ ij tieđe maiden.

Talle ferttee orniđ taggaar viärráámuu visio mield taan máttááttâs-uv tääl, sun muštâl.

Marja Liisa Olthuis
Marja-Liisa Olthuis áásá perruinis Hollandist. Tääl sun já suu párnááh láá pääihist. Govva: Yle / Anja Kaarret

Suomâst ulmuuh láá uástám hiivsigpááppár ennuv vuárkán. Hiivsigpááppár lasseen ulmuuh láá uástám vuárkán meid purrâmuš, ovdâmerkkân tonnikyele. Olthuis muštâl, ete Hollandist ulmuuh uástih siämmáánaalijn vuárkán, ko Suomâst-uv. Sun ij kuittâg jieš lah movtáskâm hiivsigpááppár uástimân.

– Jiešalnees jiem lah uástám eenâb ko táválávt, sun muštâl.

Olthuis mielâst lii tehálâš tuárjuđ páihálijd irâttâsâid tääl taan eromâš tiileest. Ohtâ muulsâiähtu lii tiiláđ purrâmuš raavvâdviäsuin pááikán.

– Purrâmušpääihih iä pyevti väldiđ äššigâsâid vuástá, ličij hirmâd pyeri tuárjuđ taid ulmuid toinnaalijn, ete uástá tobbeen liijká maidnii, sun rävvee.

Varrasamosat: Säämi

Váldoođđasat

Varrasamosat

Muualla Yle.fi:ssä