Sápmi |

Koronavirusa geažil šluhttejit dáhpáhusaid: dál eai lágit árktalaš dálveriemuid Kanádas eaige árktalaš biebmokongreassa Guovdageainnus

Koronavirusnjoammumiid mearri stuorru ja maiddái eamiálbmotdáhpáhusaid šluhttejit virusa dihte.

Emili Portti beassá AWG-gilvvuide
Anárlaš Emili Portti čuoigamin AWG-gilvvuin jagis 2018 Hay River ja Fort Smith giliin Kanádas. Govva: Charles Petterson, Sámiid Válaštallan Lihttu

Eamiálbmotdáhpáhusat maŋiduvvojit dahje šluhttejuvvojit koronavirusa, SARS-CoV-2 dihte.

Koronavirusa dihte eai áiggo lágidit Árktalaš dálveriemuid Kanádas. Árktalaš dálveriemuid nappo Arctic Winter Games -gilvvuid galge ordnet 15.3–21.3. Yukon territorio oaivegávpogis Whitehorses. Gilvvuide ledje vuolgimin sulaid 2 000 olbmo iskkadit searaideaset iešguđet šlájain dego spábbačiekčamis ja čuoigamis.

Yukon dearvvašvuođaeiseválddit mearridedje šluhttet gilvvuid, go ballet virusa njoammut gilvvuid oktavuođas, muitala NRK Sápmi. Birrasiid 60 sámi nuora ja jođiheaddji ledje mannamin AWG gilvvuide Kanádai Suomas, Ruoŧas ja Norggas.

Kárášjohkalaš spábbačiekči Stine Lise Somby lea okta sis, guhte galggai vuolgit Árktalaš dálveriemuide ovddastit Team Sámi. Vahkku ovdal mátkki Somby oaččui dieđu, ahte mátki ii ollašuvage.

– Ledjen hárjehallan oalle guhká. Lea maiddái váldán olu áiggi ráhkkanit vuolgimii, nuba lea vehá láittas go eat beasage vuolgit, muitala Somby NRK Sápmái.

Son muitala, ahte lei maid ráhkkanan dáhpáhusa šluhttemii koronavirusa dihte.

– Mu mielas lei vehá balddihahtti vuolgit dohko njoammunriskka dihte. Nuba nuppe dáfus lei aivve buorre, ahte eat vuolgán, jurddaša Somby.

Maiddái biebmokongreassa šluhttejuvvon

Guovdageainnus fas galggai otne mánnodaga 9.3. álgit Árktalaš eamiálbmogiid biebmokongreassa, muhto dan maid leat šluhtten koronavirusa dihte. Dohko galge oassálastit lagabui 200 riikkaidgaskasaš olbmo miehtá árktalaš guovllu ja máilmmi.

Riikkaidgaskasaš boazodoalloguovddáža direktevra Anders Oskal muitala, ahte mearrádusa dáhpáhusa šluhttemis ii lean váttis dahkat.

– Bearjadaga bohte ođđa rávvagat ja mearrádusat Norgga álbmotdearvvašvuođa instituhtas. Daid mearrádusaid vuođul lei čielggas, ahte eat sáhte ordnet viiddis biebmokongreassa nugo leimmet plánen.

– Mii leat dieđusge veháš behtton, muhto go dilli lei dákkár, lean aivve sihkkar ahte dát lei rivttes mearrádus. Mii iskat maŋŋeleappos geahččat buoret áiggi kongressii, muitala Oskal.

Biebmokongreassa galggai lágiduvvot dál vuosttaš háve.

Ovdalis lea dieđihuvvon maiddái, ahte ON álgoálbmogiid bissovaš forum maŋiduvvo koronavirusa dihte.

Koronavirusnjoammumiid mearri stuorru

Olles máilmmis koronavirusnjoammumat leat mánnodaga 9.3. diibmu 15.45 rádjái nannejuvvon 110 050. Dávdii leat jápmán 3 658 olbmo.

Eurohpás leat nannen dan rádjái 11 859 njoammuma. Ovdamearkka dihte Ruoŧas leat badjel 250 koronavirusdáhpáhusa ja Norggas maiddái lagábui 200 njoammuma. Koronavirusdáhpáhusaid mearri stuorru maiddái Suomas.

Dearvvašvuođa ja buresveadjima lágádus THL muitalii mánnodaga 9.3. ahte Suomas leat nannen čieža ođđa koronavirusnjoammuma. Dan lassin Gaska-Suoma buohccedikšunbire muitalii Keski-Suomalainen-aviissas eahketbeaivve golmma eará njoammumis. Oktiibuot Suomas leat dál nannen 33 njoammuma.

Varrasamosat: Sápmi

Váldoođđasat

Varrasamosat

Muualla Yle.fi:ssä