Sápmi |

Koronavirusáitta boahtá Davvi-Supmii maid davil – Čáhcesullos gávcci olbmo karantenas

Lágádusat ja fitnodagat leat smiehttagoahtán ráddjet bargiideaset mátkkiid Davvi- ja Mátta-Suoma gaskkas.

bild på coronavirus
Smávva virus, mii lea suorggahan meastta olles máilmmi. Njoammumat ja jámut lassánit olles áiggi, ja dál Suomasge máŋggat fitnodagat ja lágádusat smihttet mátkkoštanráddjemiid. Govva: All Over Press

Kiinnás vuolgán koronavirus njoammu dál maiddái Eurohpas ja davvin. Norggas koronavirus lea njommon 32 olbmui, muitala NRK. Norgga álbmotdearvvašvuođainstituhta mielde buohkat leat ain buriid veajuid alde.

Dieđut maid muitalit, ahte gávcci olbmo leat šaddan karantenai Čáhcesullo gávpogis Nuorta-Finnmárkkus, čállá iFinnmark. Maiddái Álaheajus leat golmmas, geain navdet njoammuma.

Sis leat váldojuvvon čájánasat ja dat leat dutkama vuolde.

Suoma bealde ikte eahkedis sihkkaraston njoammumiid mearri lea čieža. Ruovttukarantenas fas leat 150 olbmo, buohkat oaivegávpotguovllus. Ruovttokarantena oaivvilda, ahte olmmoš oažžu gal fitnat vaikke beatnagiin olgun, muhto son ii oaččo leat dahkamušas eará olbmuiguin dahje mannat almmolaš báikái dego gávpái.

Suomas koronavirusii lea maŋimuš buohccán bargoahkásaš almmáiolmmoš, gean lagaš birrasis leamašan njoammun.

Lágádusat smihttet mátkkoštanráddjemiid

Dáid beivviid lea maid beaggigoahtán, ahte lágádusat ja fitnodagat leat smiehttagoahtán ráddjet bargiideaset mátkkiid ovdamearkan Davvi- ja Mátta-Suoma gaskkas.

Ovdamearkan Sámedikkis čuvvot dál dili. Hálddahushoavda Pia Ruotsala-Kangasniemi muitala, ahte dán áigái hálddahusa bargit eai šatta beare ollu mátkkoštit, muhto sámepolitihkkáriid bokte lea nuppelágan dilli. Dassážii eai goit vel leat addojuvvon makkárge rávvagat bargiide ja politihkkáriidda.

– Eanemus Sámedikkis mátkkoštit politihkkárat ja ságadoallit ja dieđusge maid stivra. Dál galgat singuin maid humadit ášši birra, ahte mo mii dasa ráhkkanit, muitala hálddahushoavda Pia Ruotsala-Kangasniemi.

– Dál lea velá politihkkáriid iežaset hálddus, mo sii vihkkehallet dán mátkkoštanášši. Gal mii fertet smiehttat ja ráhkkanit, mo mii rávvet dán dilis, ja rávvagiid ráhkadit.

Dál Davvi-Suomas lea mannamin čuoiganluopmovahkku ja eanáš lágádusain leat oalle unnán bargit báikki alde. Ovdamearkan Sámemusea ja Luondduguovddáš Siiddas muitalit, ahte ášši loktana maŋŋelabbos ovdan, go olbmot máhccet bargui.

Gielddat leat rávvegoahtán olbmuid

Rávvagat orrot boahtimin juohke ráiggis, mo koronavirus njoammunáitaga vuolde galgá meannudit. Maiddái gielddat leat dieđihišgoahtán olbmuide, mo meannudit, juos navdá koronavirusnjoammuma.

Ovdamearkan Ohcejoga gielda lea dieđihan gieldalaččaide áššis. Vuosttaš rávvagiin lea riŋget dearvvašvuođaguovddážii, jus olbmos leat koronai heivejeaddji dávdamearkkat, dego alla feber, gosahat ja šaddet vuoigŋanváttisvuođat.

Vuosttamužžan ii eisige goit gánnát girddihit dearvvašvuođaguovddážii, go dalle lea várra, ahte njoammuda juoga dávdda maid earáide, vaikke ieš koronavirus ii livččege jearaldagas.

Dearvvasvuođaguovddážis goit gullá lassirávvagiid, mo galgá láhttet ja doaibmat. Nuba vuosttamužžan galgá riŋget dearvvašvuođaguovddážii, ovdalgo álgá eará doaimmaide.

Yle čuovvu koronavirusa njoammundili máilmmis dán ártihkkalis.

Varrasamosat: Sápmi

Váldoođđasat

Varrasamosat

Muualla Yle.fi:ssä