Koe uusi yle.fi
Sápmi |

Kritiikin Kannukset -bálkkašupmi Suohpanterrorii

Jagi 2012 rájes doaibman sámedáiddáriid joavku lea njuiken oanehis áiggis stuorra álbmoga diđolašvuhtii ja dáiddamáilmmi árvvusadnon doaibmin, bálkkašumi juohkán Suomen arvostelijain liitto dieđiha.

problem solved suohpanterror
Govva: Suohpanterror.

Dáiddárkollektiiva Suohpanterror oažžu dán jagáš Kritiikin Kannukset -bálkkašumi.

Suomen arvostelijain liitto ry (sá. Suoma árvvoštalliid lihttu) SARV mieđiha bálkkašumi.

– Jagi 2012 rájes doaibman sámedáiddáriid joavku lea njuiken oanehis áiggis stuorra álbmoga diđolašvuhtii ja dáiddamáilmmi árvvusadnon doaibmin, SARV:is  lohket.

"Suohpanterror ávkkástallá dáidaga giela bastilit ja čehpet"

Suohpanterror gidde fuomášumi Suoma eamiálbmoga sajádahkii earret eará plakáhtadáidaga ja performánssa vugiiguin.

Suohpanterrora dáidaga leat beassan oaidnit earret eará Kiasmas, Mänttä govvadáiddavahkuin ja Helssega Dáiddahállas.

Taidekollektiivi Suohpanterrorin posteri Suomen eduskunnalle
Govva: Suohpanterror
– Suohpanterror ávkkástallá dáidaga giela bastilit ja čehpet. Suohpanterror čujuha sámekultuvrii ja dan ovdii dahkkon aktivismii. Joavkku plakáhtadáidagis laktásit dáidaga historjjá ikonat ja populárakultuvrra govvagirji dokumentára fáttáide. Plakáhtat govvejit beaktilit sámiid sajádaga dálá-Sámis, bálkkašumi addit muitalit dieđáhusasttis.

Kritiserejit Suoma eamiálbmotpolitihka

Suohpanterror-joavku lea kritiseren earret eará Sámi luondduresurssaid- ja sámekultuvrra rivvema ja dan, ahte sápmelaččaid oainnuid eai leat váldán vuhtii politihkalaš mearrádusaid dahkamis.

Suohpanterror Blow up North
Govva: Mainoskupla
Suohpanterror lea gidden fuomášumi maiddái dasa, mo Suopma ii leat ratifiseren eami- ja čeardaálbmogiid sajádaga guoskevaš riikkaidgaskasaš ILO 169-soahpamuša.

– Suohpanterror-dáiddárjoavkku earenoamáš ánssuide gullá almmolaš saji innovatiivvalaš ávkkástallan. Joavku lea ávkkástallan eandalii čehpet interneahta ja sosiála media almmolaš sajis dáhpáhuvvan dáidaga arenan. Ná Suohpanterror lea beaggán šerres jietnan maiddái árbevirolaš dáiddainstitušuvnnaid olggobealde, SARV:is dadjet.

Suohpanterror lea vuosttas Kritiikin Kannukset ožžon anonyma dáiddárjoavku.

Kritiikin Kannukset doarju ođđa, nuorra dáiddáriid

Jagi 1961 vuođđuduvvon Kritiikin Kannukset -bálkkašupmi juhkkojuvvo jahkásaččat suopmelaš luovvi dahje loaiddasteaddji dáiddárii dahje dáiddárjovkui ánssolaš dagus muhtun dáidaga suorggis.

Bálkkašupmi addojuvvo dovddastussan jagi áigge dáhpáhuvvan buoremus johtilis ovdáneamis dahje dan dávisteaddji dagus eandalii nuorra dáiddáriidda.

Bálkkašupmelávdegoddái 2015–2016 gulle sátnejođiheaddji Harri Kuusisaari, várresátnejođiheaddji Sini Mononen, lahtut Ansa Aarnio, Heikki Jokinen, Mervi Kantokorpi, Maaria Niemi, Hannu Saha, Antti Suvanto ja Matti Tuomela. Lávdegotti čállin doaimmai SARV:a doaibmajođiheaddji Minna Juhala.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä