Säämi |

Kuálástemloveh láá tavveen pááihui nuuhâm – páihálâš kuálásteijee mielâst viermiluuvijd ij kolgâččii vyebdiđ turistijd

Meccihaldâttâs muštâl, et sij láá vuábdám maaŋgâ kuávlust tavveen puoh kuálástemluuvijd. Ohtân suijân taas lii Tiänu luosâpivdemkiäldu.

AANAAR Juvduujuuvâst láá maaŋgâ kuávlust kuálástemloveh jo nuuhâm já eres-uv kuávlui loveh láá nuhâmin. Meid eres kuávluin Tave-Suomâst lii siämmálágán tile, čiälgá Meccihaldâttâs tiäđáttâsâst.

Sii mield ohtân suijân puáhtá leđe tot, et Tiänust ij uážu taan keesi pivdeđ luosâ. Nubben suijân puáhtá leđe tot, ete meccihaldâttâs lii kolgâm mäddiláá joskâđ kuálástemluuvij vyebdim, ko čääsih láá lamaš liijkás lieggâseh.

Aanaarlâš kuálásteijee Heikki Nikula lii huámmášâm, et mottoom verd láá lamaš eenâb kuálásteijeeh, mutâ sun osko, et kyeleh kale láá tuárvi puohháid.

– Ijhân stáguigijn taid juuvâid pyevti kuorriđ ja amahân toh lopemeerih maid teehi vyebdih láá aaibâs šiev tääsist.

Kuálástemluuvijd láá taan ive vuábdám siämmáá ennuv ko ovdebái iivij-uv. Moonnâm ive rääjist ulmuuh láá movtáskâm kuálástiđ já tom puáhtá huámmášiđ kyelijuuvâin. Meccihaldâttâs mieldi kuálástemsoojij luuvij tiätumeerij pehti lii máhđulâš visesmittiđ pistevâš kuálástem.

Heikki Nikula ravintola Aanarin salissa
Kuálásteijee Heikki Nikula lijkkoo kuálástiđ. Sun läävee kuálástiđ Juvduujuuvâst já taan keesi meid Muddusjäävrist. Govva: Anna Nevalainen/Yle

Nikula imâštâl mondiet vyebdih viermiluuvijd mađhâšeijeid

Nikula mielâst lii pyeri, et Anarist láá kuálásteijeeh já ovdebái-uv iivij láá távjá vuábdám loopân luuvijd Juvduujuuvâst.

– Tavveen láá ennuv mađhâšeijeeh nuuvt toh vissásávt halijdeh taid luándufiäránijd, ijhân tast mihheen tađe immâšub lah.

Veikkâ sun illood kuálásteijein, te puoh aašijd sun ij ibbeerd. Meccihaldâttâs tooimâst Heikki Nikula kuittâg kritisist tom, et viermiluuvijd vyebdih meid mađhâšeijeid.

– Muu mielâst tast láá moonnâm rääji puástud piällái, ko Luánduriggodâhkuávdáá totkeeh-uv láá kavnâttâm, et passiivlâš pivdusijmeeri kolgâččij kepidiđ já kuittâg-uv meccihaldâttâs vuábdá viermiluuvijd.

Meccihaldâttâs meccivuávájeijee Jarmo Huhtamella muštâl, et meccihaldâttâs oovtâst Sämitige ráđádâllâmkuddijn meerid, mon ennuv viermiluuvijd vyebdih. Tast rekinistuvvoo kyeličaasij pyevtittâs, mon ennuv lii máhđulâš kuálástiđ, mon ennuv kieldâliih kuálásteh já ennuvks kieldâlijn páácá val kapasiteet.

Huhtamella muštoot, et sij iä kuittâg vyebdi ennuv viermiluuvijd já taid uástih iänááš ulmuuh kiäin láá tuveh Aanaarjäävri riddoost.

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä