Säämi |

Kuldâl já keejâ: Kulmâ immeelpalvâlus já autoin ohtsis 274 kilomeetter – Sämipappâ Mari Valjakkast lii pasepeeivijn uáli jo huáppu

Sämipappâ Mari Valjakka lijkkoo tast, ko sust láá Säämist eenâb máhđulâšvuođah, ko paapâin kaavpugist. Immeelpalvâlusah láá oovtâ peeivist táválávt kulmâ, já toh láá ain váhá ereslágáneh kielâ, kirho já ulmui keežild.

Video: Mari Valjakka
Video: Sáárákáisá Seurujärvi / Yle

Mari Valjakka tiervâd ilolávt Aanaar kirhoost. Ulmuuh sättih nabdeđ, ete paapah láá tuše tuođâliih, ko paapâ virge ij lah sijjân nuuvt uápis. Valjakka kuittâg povvust ennuv já moijáá. Sust ij pyevti jurdeđ, ete sun ličij tuše tuođalâš.

Mari Valjakka parga sämipappân Aanaar servikoddeest, ađai sun puáhtá toollâđ kirholijdtooimâid meiddei sämikielân.

Valjakka juurdâš, ete sust láá eenâb máhđulâšvuođah porgâđ pappân Säämist, ko ovdâmerkkân kaavpugist. Sun puáhtá toollâđ rippâškoovlâid, heejâid já eelliđ tiervâšvuođâkuávdáást pyeccei kulen. Kaavpugist pyecceeviäsuin lii táválávt jieijâs pappâ.

Sämipaapâst láá ereslágán tooimah ko paapâin kaavpugist. Syemmiliih paapah láá imaštâllâm Valjakka pargoost tom, ko immeelpalvâlusah láá maaŋgâin kieláin já maŋgii. Meiddei lii oomâs, ko pargomääđhih sättih leđe hirmâd kuheh.

Papin albassa on kuviointi jpka viittaa kirkastussunnuntaihin.
Jyehi immeelpalvâlusâst lii eres ráámmátlâš fáddá, já tiätu peeivijn láá tiätu kirholiih ivneh. Kirkestâspasepeivin liturgilâš ivne lii vielgâd. Govva: Sáárákáisá Seurujärvi / Yle

Oholoopâin lii huáppu já argâpeeivijn lii rijjâ

Ko iärráseh rávhuduvveh já muásuh oholoopâ, mutâ Mari Valjakka ij. Sust lii huššâ, ko sun kalga kiergâniđ toollâđ kulmâ immeelpalvâlus. Tääl sust láá kulmâ immeelpalvâlus Avelist, Anarist já Kärigasnjaargâst.

Jyehi immeelpalvâlus lii váhá ereslágán. Avelist sun sárnu ain suomâkielân já motomin sämikielân. Anarist oppeet jyehi kerdi suomâ- já sämikielân. Kärigâsnjaargâst sun ij taarbâš suomâkielâ.

– Mun lijkkuum, ete must lii máhđulâšvuotâ teivâđ ennuv ulmuid pasepeeivijn, Valjakka illood.

Jyehi immeelpalvâlusâst lii ain uđđâ ráámmátlâšfáddá, já pappâ ferttee keksiđ maggaar säärni sun tuálá.

– Kuásnii tot lii taggaar, ete mun koolgâm smiettâđ já smiettâđ já smiettâđ. Já ubâ okko mana toos ko koolgâm smiettâđ mast mun kolgâččim särnidiđ, Valjakka povvust.

Sämipappâ Mari Valjakkast lii táválávt huáppu oholoopâin, ko sust láá kulmâ immeelpalvâlus. Sun maainâst meiddei láá-uv eres paapah imâštâllâm ko sun lii sämipappâ, já montied sun lijkkoo leđe Säämist pargoost. Jietna: Sáárákáisá Seurujärvi / Yle

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä