Säämi |

Kuldâl jienâ: Jari Linjama niävdus moottorpyerást olášui já tääl sun lii vuáijám jo vittâ ive pyeráin

Jari Linjama lii ain halijdâm moottorpyerá, mutâ rähisvuođâ tiet niävdus vájáldui 15 ihán.

Jari Linjama
Jari já Kaarina Linjama vyelgimin kuávttáá kuhes reeisun. Taan nissoon tiet moottorpyerá vájáldui 15 ihán. Govva: Jari Linjama

Jari Linjama lii vuáijám moottorpyeráin vittâ ive, mutâ moottorpyerá lii lamaš suu niävdus jo ennuv kuhheeb ääigi.

Sun lâi ain halijdâm moottorpyerá, mutâ äšši vájáldui 15 ihán. Sun lâi monâmin vyeijimškoovlân, mutâ čohčâ lâi jo nuuvt kukken, et sun kolgâččij kiđđuv puáttiđ uđđâsist.

Te kiđđâlui já Linjama teeivâi káálgus já moottorpyerá vájáldui. Sun kuittâg muuštij niävdus jyehi tove ko ooinij moottorpyerá já nuuvt sun talle vittâ ihe tassaaš oostij pyerá.

Pyeremuš äšši moottorpyeráin vyejimist Linjama mielâst láá moheh. Moottorluodâ vyeijim lii ahheev, ko luoddâ lii tuše njuolgâd. Pyeremus luoddâ suu mielâst lii ucce já muálkkáá, te tast puáhtá muhâttâllâđ pyereest.

Motoristijn lii siämmáálágán vyehi tiervâttiđ nubijdis tego karavaanarijn já rekkavyeijein. Linjama lii tom váhá imâštâllâm, ko ij sun ubâ taid ulmuid tuubdâ.

Puátteevuođâst moottorpyeráin Ålandân já Sáámán

Jari Linjama maainâst, ete sust láá ennuv vuáváámeh kost sun halijdičij eelliđ moottorpyeráin. Aainâs-uv Ålandist, Kolist já sun lii meiddei kuullâm, ete Punkaharju lii moottorpyerá alme.

– Já tiäđust-uv tobbeen Säämist-uv mielâstân vala iäláččim.

Kuldâl lase anarâš saavâid tääbbin.

Pirrâ Suomâ uáinoo keessiv moottorpyerá vyeijeid, já Jari Linjama lii meiddei vuájám pyeráin ennuv. Sust piištij 15 ihheed hommáđ pyerá ko teeivâi suu tááláá káálgu. Sun kuittâg muuštij pyerá niävdus, já tääl sust lii lamaš pyerá jo 5 ihheed. Jietna: Sáárákáisáisá Seurujärvi / Yle

Varrasamosat: Säämi

Váldoođđasat

Varrasamosat

Muualla Yle.fi:ssä