Säämi |

Kuldâl jienâ: Kulá-uv Halloween Sáámán?

Anarist savâstâleh tast, kulá-uv Halloween Sáámán. Tast lii šoddâm savâstâllâm vaanhimij já škoovlâ kooskâst láá-uv tágáreh juhleh hiäivuliih Säämist. Meid kielâpiervâlist láá jurdâččâm ääši.

Henna Tervaniemi
Aanaarlâš Henna Tervaniemi mielâst Halloween puáhtá leđe meendu polâttettee suu nuorâb párnáid. Govva: Anja Kaarret / Yle

Kuldâl maid Henna Tervaniemi muštâlij Halloweenist. Jietna: Anja Kaarret / Yle

Halloween-juhle tááláš häämi lii riddonâm Amerikast meid Suomân. Motomij mielâst taat ameriiklâš ärbivyehi ij heivii Sáámán, ko tom iä lah laavim juhlođ.

Ääši tiet láá šoddâm korrâ savâstâlmeh aanaarlâš vaanhimij kooskâst. Enni Henna Tervaniemi párnáin viiđâs joteh škoovlâ Anarist. Tervaniemi imâštâl čuuvtij, ko škovlâ almottij, ete sij uárnejeh teemaoho já naamijáid.

– Mun ettim škoovlân, ete mun puávtám orniđ muu párnáid monnii eres ohjelm pääihist. Mij pyehtip juhlođ posijpeeivi. Tot lii rávhálâš, eenâb kunnijâttee já muštâččep taid ulmuid kiäh láá lamaš mijjân rákkáseh.

Halloween juhloh jyehi ive 31. peeivi roovvâdmáánu. Algâaalgâst taat ärbivyehi lii šoddâm kelttilâš ärbivyevist, mon keeltij maajeeldpuátteeh puohtii Ameriikan. Halloween lâi keeltij uđđâ ihe.

Halloween tiäivá leđe suullân siämmáá ääigi ko tave-enâmijn ávudum posijpeivi. Säämist láá čohčuv ärbivuáválávt viättám pyhámestoho já posijpeeivi, mii lii kirkkopase.

Tervaniemi ij lijkkuu toos maht ain eenâb já eenâb Halloween markkânisteh, ige haalijd, et suu párnááh uáppih toos.

Sun lii eromâšávt huolâstum suu nuorâb párnáin. Sunnui ij lah val nuuvt čielgâs mii lii tuotâ já mii fiktiivlâš. Halloween puáhtá leđe meid polâttettee tábáhtus.

– Kale tast sättih puáttiđ paloh já puoh tágáreh hyenes nahareh, sun arvâl.

Tervaniemi mielâst Ameriiklâš Halloween saajeest kolgâččij valjiđ fáádáid moh kuleh Sáámán.

Škoovlâ rehtor: teemaokko lâi škoovlâ uáppeekode juurdâ

Aanaar škoovlâ ulmen lâi orniđ suotâs tábáhtusâid škoovlâst. Aanaar škoovlâ rehtor Marja Seilonen muštâl, et taat teemaokko lâi škoovlâ uáppeekode juurdâ. Aanaar škoovlâst halijdeh adeliđ uáppeid máhđulâšvuođâ uásálistiđ škoovlâ tooimâ vuáváámân.

– Vissásávt teemaoho ohtâ movtijdittee äšši lâi tuot Halloween peivi. Vaarâ tot idea lii vuálgám tobbeen, mutâ uáppeekodde lii val ovdedâm tom jurduu. Jyehi peeivi lii miinii teemapeeivijd, lii pyjamapeivi, 80-lovo teemapeivi já vástuppeeivi talle naamijááh, muštâl Seilonen.

Henna Tervaniemen čuáccá tobdoid taat äšši ko suu mielâst Halloween, vorrâ já haavdijn pajaneijee rummâšeh iä lah häävskih.

– Mun ettim, ete kale mun iberdâm, ete škovlâ haalijd orniđ váhá ereslágán homá. Mutâ mondiet eidu taat? Tondiet halijdim vuástálistiđ já vuástálistám val nuuvt kuhháá ko lii tárbu, iätá Tervaniemi.

Kuldâl maid Aanaar škoovlâ rehtor Marja Seilonen muštâl Halloweenist sii škoovlâst. Jietna: Anja Kaarret / Yle

Kielâpiervâlist iä juhlo Halloween: "Tot ij lah lamaš Säämi kulttuurist muu mielâst mahten fáárust"

Aanaar kielâpiervâl jođetteijee Ritva Kangasniemi muštâl, ete kielâpiervâlist iä lah laavim puđâldiđ maiden, iäge puuđâld taangin ive.

– Mun lam eidu smiettâm tom, et ko tot ij lah lamaš Säämi kulttuurist muu mielâst mahten fáárust, te jiem mungin lah tom talle halijdâm, jiemge haalijd täälgin tom väldiđ. Kaavpijnhân kale uáinojeh ennuv.

Kangasniemi ij jieškin juhlo Halloween, ige lah kuássin juhlom. Sun ij peerust tom tábáhtusâst.

Ritva Kangasniemi
Kielâpiervâlijn iä laavii juhlođ Halloween mahten. Kielâpiervâl jođetteijee mielâst tot ij lah kuássin kullum Säämi kulttuurân. Govva: Anja Kaarret / Yle
Kuldâl maid Ritva Kangasniemi muštâl Halloweenist. Jietna: Anja Kaarret / Yle

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä